Ырыа куттаах Кустуурбут сиригэр улуустааҕы “Дьүрүһүй, икки тыллаах хомуһум» эстраднай, патриотическай дуэтынан ырыа күрэҕэ үрдүк таһымҥа ыытылынна.
Санатар буоллахха, бу күрэх аан маҥнай 2003 сыллаахха сүрэхтэнэн нэһилиэкпит иһинэн ыытыллыбыта. Оччолорго 4 кыттааччыттан Гран-При үрдүк аатын Анисия Тарабукина, Анастасия Захарова ылбыттара. 2005 сыллаахха улуустааҕы таһымҥа тэриллибитэ. Гран-При – Стас Самойлов, Петр Петров ылан үөрүү өрөгөйүн туппуттара. Онтон 2007 сыллаахха 3-с төгүлүн ыытыллар күрэххэ дьон-сэргэ биһирэбилин ылан, Дьарҕаалаах, Саккырыыр нэһилиэктэрэ кэлэннэр, уопсайа 11 дуэт кыттыбыта. Тэрийээччилэр күрэх балаһыанньатыгар уларытыы киллэрэн сааһынан хааччаҕа суох оҥорбуттара. Манна Гран-При үрдүк аатын Ньургустаана Старостина, Михаил Сотрудников дуэттара ылбыта. 2014 сыллаахха Гран-При хаһаайыттара – Мария Горохова, Алина Горохова, 2016 сыллаахха – Егор Гоголев, Айтал Слепцов ылбыттара. Ол кэннэ кэккэ биричиинэнэн аҕыйах сыл көтүтүүлээх 2023 сыллаахха буолбута. Манна 8 дуэт кыттан, Гран-При үрдүк аатын Ольга Попова, Елена Михаханова ылан кыайыы өрөгөйүн билбиттэрэ.
Үөһээ этиллибитин курдук, күрэх кыттыылаахтара сааһыттан хааччаҕа суох буолан, кыра да оҕо кыттыан сөп. Бу эмиэ оҕону толоруу маастарыстыбатыгар, патриотическай тыыҥҥа, култуура эйгэтигэр биир иитэр-үөрэтэр сүдү суолталаах хамсааһын буолар.
Дьэ, итинник дириҥ ис хоһоонноох күрэхпит историятын билиһиннэрэн, иһирэх тыллары этэн туран, бар дьон биһирэбилин, көрөөччү үрдүк сыанабылын ылбыт «Дьүрүһүй, икки тыллаах хомуһум” дуэтынан күрэх быйыл 7-с төгүлүн ыытылынна. Дьүүллүүр сүбэҕэ култуура эйгэтин убаастанар үлэһиттэрэ, улуустааҕы култуура салайааччыта Степан Слепцов, култуура салалтатын методиһа Полина Ефимова, 2023 с. куонкурус кыайыылааҕа, алын кылаас учуутала Ольга Попова сыаналаатылар. Ылбаҕай ырыаһыттарбыт Михаил Сотрудников, Ольга Попова, Елена Михаханова, Оксана Боярская, Мария Павловна, Стас Самойлов, “Өрөлдэк” үҥкүү ансаамбыла эҕэрдэ ырыаларынан, үҥкүүлэринэн тэрээһини киэргэттилэр. Эдэр ыччаттарбыт Михаил Боярскай, Вера Горохова иилээн-саҕалаан ыыттылар.
Күрэххэ уопсайа алта дуэт кыттыыны ылан, олус сэргэх, истиҥ иэйиилээх дьоро киэһэ тэрилиннэ.
Компетентнай дьүүллүүр сүбэ быһаарыытынан 1 ист. Лауреат – Алена Горохова, Ньургуяна Данилова, 2 ист.– Розалия Макарова, Любовь Горохова, 3 ист.– Егор Слепцов, Святослав Слепцов буоллулар.
2 ист. Дипломант үрдүк аатын биһиги кэскиллэрбит — Зарьяна Слепцова, Алеся Горохова ыллылар. Култуура эйгэтин олохторун аргыһа оҥостубут Анжела Горохова, Михаил Горохов 1 ист. Дипломант аатын ылан үөрдүлэр-көттүлэр.
Онтон Гран-При үрдүк аатын Анна Слепцова, Александра Горохова дуэттара сүгэн, муҥутуур кыайыылаах буоллулар.
Ыраах нэһилиэктэн Дьарҕаалаахтан кэлэн күрэххэ кыттыбыттара хайҕабыллаах, онтон улуус кииниттэн кэлбэтэхтэрэ хомолтолоох.
«Дьүрүһүй, икки тыллаах хомуһум” ырыа күрэҕэ быйыл ис-иһиттэн олус сатанан, хаһааҥҥытааҕар даҕаны табыллан ыытылынна. Тэрээһинэ үчүгэйэ, бириистэрэ астыга, кыттааччылар бэлэмнэрэ, барыта холбоон, түмүллэн, силигин толору ситтэ! Биһиги, дьүүллүүр сүбэ, тылынан сатаан этиллибэт ырыа кэрэ эйгэтигэр уйдаран, бары нүөмэрдэри биир тыынынан көрөн-истэн, олус диэн астынныбыт, биһирээтибит диэтэххэ татым буолуо, ол курдук быйылгы күрэх тэрээһинигэр үрдүк сыанабылы биэрэбит!
Гран-При үрдүк аатын ылбыт Анна Слепцова, Александра Горохов дуэттара кыайыаҕын кыайда, оннук үчүгэйдэр, бастыҥнар! Дьарҕаалаахтан кэлбит Ньургуяна Данилова, Алена Горохова «Аҕабар” диэн толорбут ырыалара киһи сүрэҕинэн-быарынан көҥдөй ааһар алыптаах, маладьыастар! Ыраах нэһилиэктэн кэлэн кыттыыны ылбыттарыгар махтанабыт. Бары кыттааччылар олус үчүгэйдэр, хас биирдиилэрэ үрдүк таһымнаах толоруу маастарыстыбатын көрдөрдүлэр.
Ырыа ускуустубатын өйүүр, бар дьоҥҥо көҕүлүүр Аллараа-Бытантай уонна Үөһээ-Бытантай нэһилиэктэрин дьаһалталарыгар ис сүрэхпиттэн махтанабын,» — диэн дьүүллүүр сүбэ бэрэссэдээтэлэ Степан Степанович санаатын үллэһиннэ.
Түгэнинэн туһанан, Саха сиригэр Култуура сылыгар туһуламмыт улуустааҕы “Дьүрүһүй, икки тыллаах хомуһум” күрэх спонсордарыгар – Арассыыйа социальнай пуондатын Эбээн-Бытантайдааҕы клиентскай сулууспатыгар, улуустааҕы олох-дьаһах коммунальнай хаһаайыстыбатыгар, култуура салалтатыгар, Аллараа-Бытантай нэһилиэгин олохтоох дьаһалтатыгар, Дьарҕаалаахтааҕы оскуола-саадка, «Дюбун”, “Гарпан”, “Маранга” этнокултуурунай кииннэргэ, Кустуурдааҕы уот ситимигэр, Кустуурдааҕы олох-дьаһах коммунальнай хаһаайыстыбатыгар, улуус дьаһалтатыгар махталбытын тиэрдэбит.
Мария Саргина, биһиги уопс. кэрр.