Иис умсулҕаннаах дьарыгын олохторун арахсыспат аргыһа оҥостон, бэйэлэрин тула талба талааннаах дьоммутун түмэн, «Уран тарбахтар” түмсүү тэриллэн айымньылаахтык үлэлээбитин 10 сылын бэлиэтээтэ.
Норуоппут утумун, үтүө үгэһин салҕыыр, иис үөрүйэхтэрин дьоҥҥо-сэргэҕэ тарҕатар, дириҥ билиилэрин үллэстэр түмсүү салайааччыта Елена Васильева үбүлүөйдээх сылларынан санаатын үллэһиннэ:
— «Уран тарбахтар” түмсүү үлэбитин 2016 сыл муус устар ыйга саҕалаабыппыт. Бастакы үлэбит олбох тигиититтэн саҕалаан кэлин сарыы, тирии оҥорон, таҥас тигэн таһаарарга тиийэ үлэ бөҕөтүн оҥордубут. Аны билигин араас хоруоҥка, оҕуруо эппэккэ эрэ дьиҥ чахчы эбээн омук төрүт таҥаһын хайдах баарынан уларыппакка, киэргэппэккэ сөргүтэн тигиэхтээхпит. Өбүгэлэрбит былыр таба тириититтэн таҥаһы бойбоччу кэтэн, тоҥмокко бултаан-алтаан тыыннаах сырыттахтара. Билигин да тыа дьоно оннук таҥналлар.
Биһиги түмсүүбүтүгэр уон сыл тухары элбэх киһи сылдьан иистэнэн ааста, олох аата-ахсаана суох маастар-кылаас оҥордубут, сайын лааҕыр оҕолорун эмиэ иискэ үөрэтэбит. Биһиги анардас ииһинэн эрэ муҥурдаммаппыт, уһанабыт, уҥуохтан араас киэргэл, тыас-уус таһаарар тэрили, глинанан оҥоһуктары, валяниянан таҥас хартыына оҥоробут, чубуку тириитин кырпалаан суорҕан, тэллэх, утуйар таҥас, сискэ кэтэр хаттык, кээнчэ, үтүлүк уо.д.а. тигэбит. 2025 сылга Улуу Кыайыы 80 сылынан кыайыыга сыһыаннаах диэн тэлэгириэйкэ ыстааннаах кэмпилиэгин тикпиппит, иһэ баата буолбатах, чубуку түүтэ, кэтэн көрдөххө сылааһынан угуттуур.
Инники былааммыт өссө элбэх. Кыбытыыга үлэлэрбит үгүстэр, иистэнэр Далбардарым ону толору баһылаатылар. Үлэлэрбит элбэх куонкурустарга кыттаннар диплом, грамота, сэртипикээт үгүс. Онон, өссө да этэҥҥэ эрэ буолларбыт иннибит диэки баран иһиэхпит.
Уон сыллаах үбүлүөйбүтүнэн бииргэ иистэнэр, иистэммит кыргыттарбар, хара маҥнай тэриллиэхпититтэн хос биэрэн өйөөн, күн бүгүнүгэр тиийэ өйүү сылдьар улуустааҕы социальнай харалта салайааччыларыгар Дмитриева Н. И., Сыроватская А. К. уонна үлэһиттэргэ Аверенская Л. В., Горохова Д. М. махталбытын биллэрэбит, дьоҥҥо үтүө сыһыаҥҥыт уон оччонон эргийдин, дьон махталын ыла туруҥ!
Түгэнинэн туһанан, иистэн илиилэрин араарбакка бэйэбин кытта тэҥҥэ сылдьар ыраас, көнө сииктээх, кэрэ эйгэтин баһылыы туппут кыргыттарбар Анна Артемовнаҕа, Анна Степановнаҕа, Ирина Михайловнаҕа, Елена Львовнаҕа улахан махталбын биллэрэбин.
Быйыл биһиги түмсүүбүт кыттыылаахтарыттан саамай дьоһун саастаахпыт Елена Львовна СӨ уус-уран оҥоһуктарын маастара буолла. Сүүрэн-көтөн, туруорсан, эмиэ туспа үлэ, онон кэм үлэм үтүө түмүктээх буоллаҕа, өссө да буолуоҕа диэн үөрэбин.
«Уран тарбахтар» түмсүү салайааччыта Елена Егоровна бэйэтин өйдүүр буолуоҕуттан, кыра оҕо эрдэҕиттэн ииһинэн дьарыктанар. Иис үлэтэ ураты дьаныары, үгүс сыраны, тулхадыйбат баҕа санааны ирдиирин сэрэйиэххэ эрэ сөп. Олоҕун устата сөбүлээн, умсугуйан туран дьарыктанар дьарыга үрдүктүк сыаналанан, 5 сыл анараа өттүгэр СӨ норуотун уус-уран оҥоһуктарын маастара үрдүк ааты ылбыта. Онтон былырыын, 2025 сыллаахха Таатта улууһун норуотун маастара буолбута. Маны таһынан Елена Егоровна Эбээн-Бытантай улууһун уонна Түгэһиир нэһилиэгин социальнай-экономическай сайдыытыгар кылаатын иһин мэтээллэрдээх.
«Уран тарбахтар” түмсүү бука бары кыттыылаахтарын 10 сыллаах үбүлүөйгүтүнэн эҕэрдэлээн, айымньылаах үлэҕит өссө да туругура турдун диэн туран, эһиэхэ сааскы чаҕылхай күн курдук саппаҕырбат санааны, үрүлүйэ устар үлүскэн үөрүүнү, дьолу-соргуну, чэгиэн-чэбдик доруобуйаны баҕарабыт.
Сардаана Копырина