Ханнык баҕарар норуот култууратын, тылын-өһүн илдьэ сылдьара, ураты ырыатын-тойугун, үҥкүүтүн-битиитин симэлиппэккэ кэлэр көлүөнэҕэ тиэрдиитэ омук быһыытынан тыыннаах хаалар суола.
Кулун тутар ыйга «VilTour» турфирма нөҥүө путевка ылан, доҕордуу Кытай сиригэр баран «Вихре творчества” II-c Аан дойдутааҕы бэстибээлгэ кыттан кыайыы көтөллөөх кэллибит.
Бу бэстибээлгэ Арассыыйа араас муннугуттан кыттааччылар, ону тэҥэ биһиги Сахабыт сириттэн 10 ансаамбыл кыттыыны ылбыта. Күрэх 80 тахса нүөмэрдээх 3 блогунан ааста, биһиги икки блокка 6, 28 нүөмэринэн киирбиппит.
Бэстибээлгэ «Аянеса” этно-фольклорнай ансаамбыл икки салайааччылаах 12 иитиллээччитэ буолан “Художественное слово» номинацияҕа “Миалын» композициянан I истиэпэннээх Лауреат уонна “Вокальное творчество» номинацияҕа эмиэ I истиэпэннээх Лауреат буоллубут!
Гала-кэнсиэргэ бастыҥтан бастыҥ нүөмэрдэр сүүмэрдэнэн, Сахабыт сириттэн биһиги эрэ «Эвинек” диэн ырыабыт талыллан киирбитэ улахан чиэс буолла, оҕолору өссө долгутта.
Бу бэстибээлгэ көхтөөх кыттыыны ылан, бэйэбит омукпут култууратын, сиэрин-туомун, үтүө үгэстэрин аан дойду туонатыгар көрдөрөн, үрдүк ситиһиилэнэн кэлбиппит таһынан оҕолорбут сааскы каникулларыгар дуоһуйа сынньаннылар, атын сири-дойдуну көрдүлэр, сэргээтилэр.
Бу умнуллубат кэрэ түгэннэри бэлэхтээбит, бэстибээлгэ кыттыыны ыларбытын өйөөбүт дьоннорбутугар, чуолаан иитиллээччилэрбит төрөппүттэригэр, улуус дьаһалтатыгар, улуустааҕы үөрэҕирии салайааччытыгар Устин Иванович Николаевка, Оҕо саас киинин салайааччытыгар Анастасия Павловна Архиповаҕа улахан махталбытын тириэрдэбит.
Төрүт култуура кута-сүрэ, уйулҕата, тыына ийэ тыл уонна фольклор нөҥүө арыллар. Бу туохха да тэҥнэммэт сүҥкэн суолталаах сырдык аналы толорор кэнчээри ыччаппытыгар үүнэр-сайдар, киэҥ араҥаҕа тарҕатар кыаҕы биэрии – бу буолар бараммат дохуобунай баайбыт, омукпут тыыннаах хаалар, сайдар олуга.
“Аянеса» Арассыыйаҕа образцовай этно-фольклорнай ансаамбыл салайааччыта Татьяна Чичигинарова, хореограба Наталья Степанова