Саха Өрөспүүбүлүкэтигэр култуура уонна духуобунай сайдыы миниистирэ Афанасий Ноев Эбээн Бытантай национальнай улууһун Аҕа баһылыгын Иннокентий Стручковы кытта сөбүлэҥ түһэристилэр.
Бу күннэргэ Иннокентий Николаевич улуус социальнай-экэнэмиичэскэй сайдыытыгар туһуламмыт боппуруостарга Дьокуускай куоракка үлэлиир. Биир бастакынан кини СӨ култуураҕа миниистирн Афанасий Ноевтыын көрсөн, бииргэ үлэлэһиигэ сөбүлэҥ түһэристилэр.
— Биһиги улууспут Сэбиэскэй Сойуус саҕана биир бастакы национальнай статустаах улуус буолбуппут. Култуура эйгэтигэр сүрүннээн эбээн омук төрүт дьарыгын, үгэстэрин, сиэрин-уомун уонна култууратын сайыннарыыга тиһиктээхтик үлэлиибит. Тылбыт харыстыырга кэккэ кыһалҕалар бааллар, ол эрэн бу өттүгэр култуура нөҥүө киэҥ далааһыннаах үлэ ыытыллар. Билиҥҥи кэмҥэ тылы тута сылдьааччыларбыт олох аҕыйахтар, кэнчээри кэскилбит – оҕолорбут эбээн омук, чуолаан түгэһиирдии тылы-өһү култуура нөҥүө иҥэринэллэр, сүрдээҕин диэн үтүө түмүктээҕин бэлиэтиир тоҕоостоох. Бүгүн баттаныллыбыт сөбүлэҥ бу үлэбитин, култуурабыт сайдыытыгар, бырагыраамаларга үлэлииргэ улахан суолталаах.