И.Н.Слепцов аатынан Кустуур агропрофилированнай оскуолата сынньалаҥы туһалаахтык атаарар. Ол курдук, нэдиэлэ устата оҕолорго, төрөппүттэргэ анаан элбэх тэрээһин буолан ааста.
Оскуолабыт аатын сүгэр ытык киһибит И.Н.Слепцов сиэнэ Иннокентий Егорович Колесов, физкультура учуутала, 5-8 кылаастарга дуобат оонньуутун тэрийэн ыытта. Манна орто сүһүөх кылаас оҕолоро толкуйдарын тобулан, өйдөрүн түмэн оонньоотулар. Онтон алын 1-4 кылаастарга эти-хааны эрчийэр, чэбдигирдэр, сүүрүүлээх-көтүүлээх күөн көрсүһүүнү Василий Андреевич Попов ыытта. Кэлбит оҕо бары үөрэн-көтөн тарҕастылар.
Төрөппүтү кытта үлэ былааннаахтык барар. Төрөппүттэр бу да сырыыга туора турбакка культурнай-спортивнай комплекска оҕолорго сэргэхситэр оонньуулары, күрэхтэри тэрийэн ыыттылар. Алын кылаас оҕолоро олус диэн сэргэхсийэн, үөрэн-көтөн бары түһүмэххэ актыыбынайдык кытыннылар. Оскуолабыт учууталлара төрөппүттэргэ, үөрэнээччилэргэ, олохтоохторго анаан маастар- кылаастары тэрийдилэр. Колесова Зинаида Анатольевна, Колесова Валентина Николаевна, Горохова Вера Михайловна олус интэриэһинэйдик ыыттылар. Хомуска араас матыыптары дьүрүһүйэ оонньоотулар, оһуохайы оройуттан тутан оһуохайдаан сэгэлдьэстилэр. Уран иис умсулҕаныгыр «Кыбытык тигии», эти-хааны чэбдигирдэр үҥкүү, флешмоб ыытыллан, хоту норуот үҥкүүтүнэн һээдьэнэн түмүктэннэ. Сылдьыбыт эрэ киһи бары махталын этэн, сылаанньыйан-дуоһуйан тарҕастылар.
Дьиэ кэргэн, төрөппүт, оскуола быстыспат биир ситимнээхтик үлэлиир. Ол курдук, сэтинньи ыйа — Байанай ыйыгар дьүөрэлээн 7 кылаас үөрэнээччилэрэ төрөппүттэрин кытта Старостина Надежда Прокопьевна, Старостина Виктория Семёновна, Старостин Иннокентий Васильевич буранынан арыаллаан, онтон кылаас салайааччыта оскуола буранынан Старостин Владимир Владимирович айылҕаҕа, эбэҕэ киирэн оҕолору муус аннынан балыктатан кэллилэр. Байанайдара «мичик» гынан оҕолор өттүк харалаах, илии тутуурдаах кэллилэр. Бу курдук туһалаахтык бириэмэни ыытан, эргиччи үтүө сынньалаҥ оҕолорго буолла.
Кустуур оскуолатын иитэр үлэҕэ завуһа Надежда Слепцова