Кустуур нэһилиэгин агро-оскуолатын «Кумах Сыһыы» учаастагар оҕону үлэҕэ иитэр-үөрэтэр дьиэ тутулунна. Бу күннэргэ үрдүкү кылаас оҕолоро саҥа тутуллубут баасаҕа от үлэтигэр үөрэнэ, сайыҥҥы үтүө кэмнэри туһалаахтык атаара барыы түбүгэр сылдьаллар.
Сиһилии Кустуур орто оскуолатын дириэктэрэ Матрена Горохова сырдатта:
— Былырыын саас улууспут баһылыга Гаврил Горохов биһиги оскуолабыт оҕону тыа олоҕор, үлэҕэ сыһыаран үөрэтэр-иитэр сыаллаах бааса туттуохпутун баҕаран, бырайыак оҥорбуппутун көрөн-истэн, өйөөн «Кумах Сыһыы» учаастагар сир ылан биэрбитэ.
Саас учебнай-производственнай хаһаайыстыбаттан дьиэ туттарбытыгар көҥүл ыламмыт, бырайыактыыр-симиэтэлиир докумуоннарын оҥорторон, бэйэбит уолбут Дмитрий Горохов быһа гыммакка тута сөбүлэһэн, кылгас кэм иһигэр 2 кыбартыыралаах дьиэни саҥа матырыйаалларынан тута охсон, уотун-күөһүн киллэрэн, ис-тас үлэтин түмүктээн туттарда.
Бу баасабытын өссө да тупсаран, эбии тутуулары ыытар, күрүө-хаһаа оҥостор былааммыт элбэх. Билигин улахан кылаас оҕолоро сайыҥҥы сынньалаҥнарын туһалаахтык атааран, от үлэтигэр үөрэнэ тахсаары тэринэллэр. Инникитин баасаҕа оҕолор кыраайы үөрэтэр экспедициялары оҥоруохтара, полевой матырыйааллары хомуйуохтара. Онон чинчийэр-үөрэтэр сыал эмиэ баар.
Маны кытта кэккэ үтүө сонуннаахпыт. Ол курдук, А.Е. Артемьев салайааччылаах “Саха сүөһүтэ” тэрилтэ «Бытантай кэскилэ» оҕо тэрилтэтин иһинэн үлэлиир «Сайдыы» волонтерскай этэрээт оҕолоругар 10 тыһ. солк. уу харчыны туттарбыта. Бу харчыбытыгар волонтерскай этэрээт оҕолоругар анал көстүүмнэри атыыластыбыт. Билигин ити көстүүмнэри сайылыкка тахсар оҕолор үлэҕэ кэтиэхтэрэ.
Суол хаһаайыстыбатын министиэристибэтин көҕүлээһининэн «Арктика суоллара» тэрилтэ сааскы көрдөһүүбүтүн ылынан, ыраах айаҥҥа, тыаҕа илдьэ сылдьарга ыраахха диэри хабар «Эрэл-2» рациялары бэлэхтээтилэр. Бу тэрил биһиэхэ олус наадалааҕын өйдөөн бэлэхтээбит «Арктика суоллара» тэрилтэҕэ уонна суол хаһаайыстыбатын министиэристибэтигэр, ону тэҥэ харчынан көмөлөспүт «Саха сүөһүтэ» тэрилтэҕэ, салайааччы Александр Артемьевка Кустуур оскуолатын кэлэктиибин, үөрэнээччилэрин уонна төрөппүттэр ааттарыттан махтанабыт.