Кустуур орто оскуолатын иһинэн оҕо-аймах ыһыаҕа олус сэргэхтик, өрө көтөҕүллүүлээхтик ыытылынна.
Оскуолабыт ыһыаҕар арылыйа сырдыы күлбүтүнэн күммүт туран биэрдэ. Ыраас-чэбдик буоллун диэн халлаан ньуура көҕөрүмтүйэ көһүннэ, көхтөөх үөрүүлээх буоллун диэн күммүт уота күүскэ тыкта.
Бары бииргэ мустан, алгыс ыытыллар кэмигэр ытыспытын үрдүк мэҥэ халлааҥҥа туһаайан ыраастанныбыт. Самаан сайыны уруйдаан, ыһыахха хомус тыаһаата, чабырҕах ааҕылынна, оһуохай этилиннэ, норуот ырыата ылланна. Өбүгэ оонньууларыгар: мас тардыһыытыгар, тутум эргииригэр, кус быһыйга уолаттар, кыргыттар кылыйан кыыралдьыттылар, кыайыы үрдүк өрөгөйүн биллилэр.
Онтон төрөппүттэр, учууталлар маанылаах сахалыы сандалы остуолун тарпыттара көрүөххэ олус үчүгэй буолла.
И.Н. Слепцов аатынан Кустуур орто оскуолатын дириэктэрэ Горохова Матрена Алексеевнаттан үөрэх дьыла хайдах түмүктэммитин туһунан кылгастык кэпсииригэр көрдөстүбүт.
— Үөрэх сылын түмүгүнэн «Дэгэн» түөскэ кэтиллэр бэлиэ оскуола Ыhыаҕар үөрүүлээх быhыыга-майгыга үрдүк ситиhиилэрдээх үөрэнээччилэргэ уонна учууталларга туттарылынна. Ол курдук, былырыын алта үөрэнээччи уонна түөрт учуутал бу бэлиэни ылбыт буоллахтарына, быйыл оскуола аатын улахан түһүлгэлэргэ, күрэхтэргэ, научнай-чинчийэр конференцияларга ааттаппыт 15 үөрэнээччи — күөх, 4 үөрэнээччи — кыhыл бэлиэни тутан үөрдүлэр-көттүлэр уонна оскуола материальнай-техническэй базата, хаhаайыстыбата бөҕөргүүрүн туhугар улахан күрэхтэргэ, тэрээhиннэргэ үөрэнээччилэри кытыннаран, үрдүк ситиhиилэри аҕалбыт педагогтарга күөх, кыhыл уонна көмүс бэлиэлэр туттарылыннылар.
«Дэгэн» (эбээн тылыттан «көтүү» (полет)» оҕолору үрдүккэ кынаттаатын, ситиhиилэри аҕала турдун!
Кустуур орто оскуола иһинэн сайыҥҥы медиа куруһуок эдэр кэррэспэндьиэннэрэ