“Хаарчаана” оҕо уһуйааныгар «Саха ынаҕа – биһиги киэн туттуубут” диэн научнай-практическай кэмпириэнсийэ ыытылынна.
Кэмпириэнсийэҕэ “Чуораанчык” бөлөхтөн Карина Сотрудникова, “Кустук” бөлөхтөн Настя Никитина, “Сулусчаан” бөлөхтөн Дьулуур Стручков, Далаана Потапова, Елизавета Боярская кыттыыны ыллылар. 
Оҕолор бары сахалыы таҥнан-саптан кэлэннэр, истиэндэ үлэтин бэлэмнээн, дьон иннигэр туран чообуотук саҥаран-иҥэрэн, төрөппүттэр уонна иитээччилэр кыһаллан туран бэлэмнээбиттэрэ тута көһүннэ. Бэл диэтэр, Настя Никитина саха ынаҕыттан үрүҥ ас эгэлгэтин, Дьулуур Стручков көбүкүнү аҕалан дьүүллүүр сүбэни күндүлээтилэр.
Кэмпириэнсийэ 4 хайысханан, ол эбэтэр «Саха ынаҕа – биһиги киэн туттуубут”, “Ынах сүөһү биһиэхэ тугу биэрэрий”, “Сүөһүнү иитээччи үлэтэ-хамнаһа”, “Ынах сүөһүнү иитэр чулуу үлэһиттэр” диэн салааларга араҕыста. Кыракый кыттааччылар улахан киһилии боччумуран туран үлэлэрин дьоһунньук көмүскээтилэр.
Ол кэннэ «Хаарчаана” оҕо уһуйаанын сэбиэдиссэйэ Марина Верховская, нэһилиэкпитигэр саха ынаҕын иитэр-ууһатар чулуу үлэһиттэр Светлана Слепцова, Фаина Колесова састааптаах дьүүллүүр сүбэ түмүктэри таһаара бардылар. Бу бириэмэҕэ көрөөччүлэри чуҥкуппакка, улахан бөлөх иитиллээччилэрэ ылбаҕай ырыаны бэлэх уунан сүргэбитин көтөхтүлэр.
Дьэ, долгутуулаах түгэн үүннэ. Уһуйаан сэбиэдиссэйэ Марина Васильевна кыттааччылары барыларын хайҕаан, хас биирдиилэрин эйэҕэс тылынан бэлиэтээн туран, оҕолор бу үлэлэрин өссө ситэрэн, чочуйан биэрэллэригэр, уһуйаантан кынат анньынан салгыы Оҕо саас киинигэр ыытыллар кэмпириэнсийэлэргэ кытталларыгар, улаатан өрөспүүбүлүкэ таһымыгар Дьокуускай куоракка да барыахтарын сөбүн туһунан этэн туран, хас биирдиилэригэр Диплому кытары оонньуурдары бэлэх туттаран кырачааннары үөртэ. Бэлиэтээн эттэххэ, кэмпириэнсийэҕэ биэс оҕо кыттыыны ылбыт буолан, кыттааччылар бары хайысхаларга кыайыылаах үрдүк аатын сүктүлэр.
Үөрүүлээх түгэн манан эрэ бүппэтэ, ол курдук аар саарга аатырар саха ынаҕын иитэр «Бытантай” хааһына тэрилтэтин солбуллубат зоотехника Светлана Дмитриевна хотоҥҥо үлэлиир ийэтигэр мэлдьи көмө буолар кыысчааҥҥа Настя Никитинаҕа анал бирииһи туттарда. Чөмпүйүөн ыанньыксыт Ульяна Никитина туһунан олус үчүгэй үлэни бэлэмнээбит Лиза Боярскаяҕа уһуйаан иитээччитэ, Ульяна Николаевна сиэнэ Мария Кызыловна эмиэ анал бирииһи туттарбыта икки бүк үөрүүнү бэлэхтээтэ.
Бу курдук, уһуйаантан саҕалаан кырачааннар научнай-практическай кэмпириэнсийэҕэ кыттан, билим эйгэтигэр бастакы холонуулара буолар. Оҕолорбут салгыы кынат анньынан, оскуола, улуус, өрөспүүбүлүкэ таһымнаах кэмпириэнсийэлэргэ кытталларыгар, үүнэн-сайдан иһэллэригэр баҕарабыт. Онуоха оҕо сааспыт биһигин кыһата бастакы олугу уурара олус үчүгэй!
Сардаана Копырина