Саха Өрөспүүбүлүкэтигэр Арассыыйа Федерациятын Судаарыстыбаннай Дууматын дьокутааттарын талыыга уонна биир кэмнээх куоластааһын күнүгэр анаммыт быыбардарга куоластааһын түмүктэннэ.
«Биир ньыгыл Арассыыйа» баартыйаҕа куоластааһын түмүгүнэн Судаарыстыбаннай Дуумаҕа үлэлии сылдьар дьокутааппыт Галина Данчикованы испииһэгинэн ыытар кыаҕы биэрдэ. Биир мандааттаах быыбардыыр уокурукка СӨ ыччат дьыалатыгар миниистирэ уонна анал байыаннай дьайыы бэтэрээнэ Петр Шамаев эрэллээхтик инники күөҥҥэ киирдэ. Саха сиригэр өр сылларга аан бастаан биир мандааттаах уокуруктан «Биир ньыгыл Арассыыйа» дьокутаатынан буолуоҕа.
Дойдубут Бэрэсидьиэнин Владимир Путины уонна кини Арассыыйа сайдыытыгар хайысхатын өйүүрбүтүн туоһулаан биһиги улууспутугар «Биир ньыгыл Арассыыйа» эрэллээхтик кыайда. «Биир ньыгыл Арассыыйа» дойду сүрүн бэлитиичэскэй күүһүн уонна бэрэсидьиэн тирэҕин быһыытынан инники күөҥҥэ тахсыыта толору сокуоннай. Ол курдук, статистика көрдөрөрүнэн биһиги улууспутугар испииһэгинэн 1872 куоластыыр бырааптаах киһи баар, ол эрэн араас биричиинэнэн дьоммут өрөспүүбүлүкэ араас улуустарынан, өрөспүүбүлүкэ таһынан, ону тэҥэ устудьуон оҕолорбут киирэллэр. Ол иһин куоластыыр дьоммут ахсаана баар дьонунан дьиҥ аахтахха 1000 кэриҥэ эрэ. Ол курдук быыбарга 835 киһи кытынна, ол 44,60 % куоластыыр дьон ахсааныттан, онтон дьиҥ баар дьонунан ыллахха тус бэйэм көрүүбүнэн 83,5% буолуон сөп. «Биир ньыгыл Арассыыйа» баартыйа 44,55% (372 киһи), КПРФ-27,19% (227 киһи), «Сиэрдээх Арассыыйа» — 9,46% (79 киһи), «Саҥа дьон» — 8,26% (69 киһи), ЛДПР – 3,11% (26 киһи), «Биэнсийэлээхтэр баартыйалара»-2,40% (20 киһи), «Арассыыйа коммунистара»-1,68% (14 киһи), «Родина»-0,84% (7 киһи), «Зеленые»-0,60% (5 киһи), «Партия прямой демократии» -0,36% (3 киһи). Биир мандааттаах уокурукка Шамаев П.В. — 285, Тумусов Ф.С.-262, Заморщикова Н.Ю. — 120, Васильев А.И. — 89, Лаптев А.И. — 23, Сыромятникова А.С. — 13, Ю В.Ш. — 12, Парахин Г.П. — 9, Лаптев А.И. — 9 куолас ыллылар.
Биир дойдулаахтарбар, дьоммор-сэргэбэр куоластааһыҥҥа кыттыбыт хас биирдии киһиэхэ ис сүрэхпиттэн махтанабын. Эһиги бары гражданскай иэскитин толорон Саха сирэ, улууспут инникитигэр улахан интэриэстээххитин көрдөрдүгүт. Билигин саҥа күн саҕаланна, хас биирдиибитин саҥа соруктар кэтэһэллэр. Бары бииргэ тутуһан, бэйэ-бэйэҕэ ытыктабыллаахтык сыһыаннаһан, тапталлаах улууспут, Эбээн-Бытантайбыт үтүө туруктаах буолуутун бары бииргэ ситиһиэхпит диэн эрэнэбин.
Иннокентий Стручков, Эбээн-Бытантай национальнай улууһун Аҕа баһылыга