Эбээн-Бытантай улууһугар өрөспүүбүлүкэтээҕи уонна муниципальнай таһымнаах быыбардар түмүктэннилэр. «Быыбардар тэрээһиннээхтик баралларын туһугар сүрдээх улахан үлэ ыытылынна”, — диэн территориальнай быыбардыыр хамыыһыйа бэрэссэдээтэлин э.т. Михаил Тарабукин эттэ.
— Территориальнай быыбардыыр хамыыһыйа алта киһиттэн састааптаах, учаастактааҕы быыбардыыр хамыыһыйалар 22 чилиэннээх үлэлээтилэр. Быыбардар ыытыллар кэмнэригэр кандидаттартан 24, баартыйалартан уонна уопсастыбаннай палаататтан 17 кэтээн көрөөччүлэр үлэлээтилэр. Хамыыһыйаларга быыбар хампаанньатын устата биир да үҥсүү, сайабылыанньа киирбэтэ, кэһии тахсыбата.
Түгэнинэн туһанан, үс ый кэриҥэ сыралаһан үлэлээбит кэллиэгэлэрбэр, территориальнай уонна учаастактааҕы хамыыһыйалар чилиэннэригэр улахан махталбын тиэрдэбин.
Санатар эбит буоллахха, Эбээн-Бытантай улууһугар СӨ Ил Дарханын быыбарыгар 1892 быыбардааччы баарыттан 1100 киһи, ол эбэтэр 58,13% кытынна. Быыбарга кыттыыны ылбыт куоластааччылар баһыйар улахан аҥаардара 960 киһи (87,27%) куоластарын Айсен Николаевка биэрдилэр.
Онтон муниципальнай таһымнаах быыбарга 2045 быыбардааччы баарыттан 1085 киһи, 53,05% кытынна. Киирсии сытыы буолла диэххэ наада. Улууспут баһылыгын дуоһунаһыгар туруоруммут үс кандидаттартан Иннокентий Стручков баһыйар үгүс куолаһы ылан, саҥа баһылык буолла.
