Быйыл Саха сиригэр Ил Дархан Айсен Николаев Култуура сылын биллэрэн турар. Дьон-сэргэ үөрэ мустар сирэ, “Дюбун” этно-култуурунай киин — Үөһээ Бытантай нэһилиэгин биир тутаах тэрилтэтэ. Бу киин уус-уран салайааччытынан Марианна Корнилова үлэлиир.
Марианна Дмитриевна идэтин сөбүлүүр, саҥалыы көрүүлээх, бэриниилээх үлэһит, кулууп үлэтин барытын сааһылаан, биир сыалга-сорукка түмэн, айымньылаахтык үлэлиир-хамсыыр. Кини көҕүлээһининэн араас сэргэх тэрээһиннэр сотору-сотору ыытыллаллар. Нэһилиэнньэ бары араҥаларыгар: оҕоҕо, ыччакка, орто саастаахтарга, кырдьаҕастарга, араас дьарыктаахтарга аналлаах тэрээһиннэри, куруһуоктары, түмсүүлэри тэрийэн үлэлэтиигэ сүрүн сүбэһит буолар.
Ити курдук, куруук үлэ үөһүгэр сырыттар да, аны иллэҥсийэ түстэр эрэ, элбэх оҕолоох эдэр ийэ, оҕолорун бэрийэн, тэрийэн, уһуйаан, оскуола иһинэн ыытыллар бары тэрээһиннэргэ көхтөөхтүк кыттар. Дэлэй астаах хаһаайка бэрдэ, истиҥ-иһирэх сыһыаннаах күндү ийэ.
Нина Софронова, биһиги уопс. кэрр.