1925 сыл алтынньы 8 күнүгэр Саха сирин күөх халлааныгар бастакы сөмөлүөт –“Сопвич” биплан көтөн тахсыбыта, ити күнтэн ыла авиация хайыы үйэ биир үйэ устата сайдан, өрөспүүбүлүкэ олоҕор-дьаһаҕар дьоһун суолталаах.
Биһиги биир дойдулаахпытын, Арассыыйа гидрометеосулууспатын уонна Саха сирин авиациятын Бочуоттаах үлэһитин Евдокия Григорьевна Горохованы гражданскай авиация төрүттэммитэ 100 сылынан итиитик-истиҥник эҕэрдэлиибит!
Евдокия Григорьевна олоҕун устатын тухары метеосулууспаҕа эҥкилэ суох бэриниилээхтик үлэлээн, бар дьонун, биир дойдулаахтарын ытыктабылларын ылар. Кини олоҕун, үлэтин туһунан орто сиэн кыыс, Саккырыыр орто оскуолатын 9 кылааһын үөрэнээччитэ Динара Горохова маннык кэпсиир:
— Мин эбээм Евдокия Григорьевна 1994 сыллаахха олунньу 2 күнүгэр Сэбээн Күөл бөһүөлэгэр күн сирин көрбүтэ. Ийэтэ Федора Васильевна Колесова, аҕата Григорий Григорьевич Горохов. Эбээм сэттэ оҕолоох ыалга (4 кыыс, 3 уол) төрдүс оҕо буолар. Сэрии кэмигэр Саккырыыртан сибиниэс (хорҕолдьун) хостоооһунугар Сэбээн Күөлгэ дьону хомуйан үлэҕэ ыыппыттара, ол кэмҥэ төрөөбүтэ.
Эбээм бииргэ төрөөбүттэрэ, кыргыттар бары төрдүөн метеосулууспаҕа ситиһиилээхтик үлэлээбиттэрэ, уолаттар бары чулуу табаһыттар.
Эбээм 10 кылааһы бүтэрээт ыстаадаҕа биир сыл үлэлээбит. Оччотооҕу кэмҥэ эдэр дьон бастаан үлэлээн баран, идэни баһылыы үөрэнэ бараллара. Мин эбээм комсомольскай путевканан биир сыл эдэр ыччат ыстаадатыгар үлэлээбитэ. Ол дьыл 1961 сыллаахха «Ленинскэй» сопхуос саҥа тэриллибитэ.
«Саас улахан кылаас үөрэнээччилэрэ 30-ча оҕо, дириэктэрбит Тимофей Алексеевич Винокуров быраактыкаҕа 10-ча таба сыарҕатынан ыстаадаҕа тахсыбыппыт. Миигин кытта Валерий Семенович Попов, Вера Афанасьевна Попова, Венера Васильевна Колесова, Геннадий Семенович Горохов, Василий Афанасьевич Степанов, настаабынньыктарбыт Поповтар, Михаил Афанасьевич Лукин, биригэдьиирбит убайым Семен Григорьевич Горохов ыстаадаҕа үлэлээбиттэрэ.
Сэбээн оҕолоро Кейметиновтар, Степановтар, Андрей Васильевич Кривошапкин уучаҕы, сыарҕалаах табаны сатыыр буоланнар бостууктары кытта һуумаҕа барбыттара, атыттар дьиэҕэ хаалан мас, муус бэлэмнээбиппит. Сарсыҥҥытыгар барыбытын эмиэ сыарҕанан һуумаҕа илдьибиттэрэ, онно саҥа төрөөбүт тугуту көрбүппүт, уучаҕы мииннибиппит, отуу оттон чэйдээбиппит. Оҕолор олус астыммыппыт», — диэн эбээм ахтар.
Евдокия Григорьевна таба иитиитин курдук төрүт салааҕа биир сыл үлэлээн баран, сибээс техникумугар үөрэххэ киирбит, 1 сыл кэтэхтэн үөрэммит.
1965 сыллаахха үлэтин саҕалыырыгар метеосулууспаҕа салайааччынан Надежда Афанасьевна Слепцова Белоруссияттан кэлэн үлэлии сылдьара. Евдокия Григорьевнаны кытта өссө Револина Софроновна Безрукова, Мария Васильевна Колесова, Александра Григорьевна Захарова, Вера Ивановна Рожина, Посельский уо.д.а. үлэлээбиттэрэ.
1966-1969 сс. Усть-Нераҕа үс сыл үлэлээн баран, төттөрү Саккырыырга кэлэн үлэлии сырыттаҕына, 1970 сыллаахха Свердловскай куоракка үөрэххэ ыыталлар. Үөрэҕин бүтэрээт Баатаҕай-Алыытын АМСГ начаалынньыгынан ананан кэлэн үлэлиир.
1994 сыллаахха бочуоттаах сынньалаҥҥа, биэнсийэҕэ таҕыстар да үлэһит хаадыр тиийбэтинэн 2012 сыллаахха диэри метеосулууспаҕа үлэлиир. Үлэтин уопсай ыстааһа – 52 сыл.
Эбээм идэтэ олус наадалаах, метеорологическай дааннайа суох сөмөлүөттэр көппөттөр. Пассажирдар тустарыгар эппиэтинэһи, бастатан туран, метео үлэһиттэрэ сүгэллэр. Кинилэр айылҕа, күн-дьыл уларыйыытын күннэтэ кэтээн көрөллөр.
Эбээм Евдокия Григорьевна олоҕун устатын тухары метеосулууспаҕа үтүө суобастаахтык, эҥкилэ суох бэриниилээхтик үлэлээн дьон-сэргэ, биир дойдулаахтарын ытыктабылын ылбыта. Кини Арассыыйа гидрометеосулууспатын уонна Саха сирин авиациятын Бочуоттаах үлэһитэ, үлэ бэтэрээнэ, сэрии оҕото, үгүс үбүлүөйүнэй мэтээллэр хаһаайкалара.
Үлэ уонна социальнай харалта Эбээн-Бытантайдааҕы салалтата