Саха Өрөспүүбүлүкэтин Ил Дарханын, норуот дьокутааттарын, Эбээн-Бытантай улууһун баһылыгын, оройуон Сэбиэтин дьокутааттарын талар өрөспүүбүлүкэтээҕи уонна муниципальнай таһымнаах быыбардар сарсыҥҥыттан саҕалаан үс күн устата буолуохтара. Онтон атырдьах ыйын 20 күнүттэн саҕаламмыт мөлтөх суоллаах-иистээх сирдэргэ, тэйиччи сытар учаастактарга болдьоҕун иннинэ куоластааһын бүгүҥҥү күнүнэн түмүктэннэ.
Бу күннэргэ биһиги улууспутугар Түгэһиир нэһилиэгин 687№-дээх учаастактааҕы быыбардыыр хамыыһыйатын чилиэннэрэ чугас сытар ыстаадаҕа, сылгыһыттар баасаларыгар, отчуттарга “водомет” диэн олус абыраллаах устар аалынан айаннаан тиийэн, тыа дьонун куоластаттылар.
Ол курдук, атырдьах ыйын 5 күнүгэр быыбардыыр хамыыһыйа чилиэннэрэ Николай Атласов, Ксения Лукина водометунан 3 чаас кэриҥэ айаннаан, 6№-дээх ыстаада табаһыттарыгар тиийэн, түөрт киһини куоластаттылар. Кинилэри «КПРФ” баартыйа өрөспүүбүлүкэтээҕи салаатын наблюдателэ Петр Сотрудников водометунан илдьэ сырытта.
Нөҥүө күн, атырдьах ыйын 6 күнүгэр эмиэ бу дьонтон састааптаах быыбардыыр хамыыһыйа чилиэннэрэ Аччыгый Үрэххэ Бочкаревтар сылгы, ынах иитэр баасаларыгар сарсыардаттан айаннаан, күн ортото тиийэн, икки киһини куоластаттылар. Кинилэри сири-уоту билэр сирдьит Леонид Бочкарев водометунан илдьэ сырытта.
Быыбардыыр хамыыһыйа чилиэннэрэ Аччыгый Үрэхтэн төннөн иһэн, аара Таала Тумсугар тохтоон, икки отчуту куоластатан аастылар. 
Түгэнинэн туһанан, территориальнай уонна учаастактааҕы быыбардыыр хамыыһыйа күһүҥҥү уларыйа турар халлааны, ардаҕы-самыыры, ууннан айан күчүмэҕэйин аахсыбакка водомет тэрили сатабыллаахтык, харгыһа суох салайан, тыа дьонун быыбардыыр бырааптарын толороллоругар кыах биэрбит Петр Сотрудниковка, Леонид Бочкаревка барҕа махталларын тириэрдэллэр.
«Былдьаһыктаах күнү-дьылы баттаһа тиритэ-хорута үлэлии сылдьар отчуттар, ыарахан үлэттэн чэрдийбит илиилээх табаһыттар, сылгыһыттар нэһилиэнньэлээх пуунтан төһө да тэйиччи үлэлии сырытталлар, буолаары турар үрдүк таһымнаах быыбарга кыттыыны ылан, гражданскай иэстэрин толорбуттарыттан үөрдүлэр, астыннылар», — диэн учаастактааҕы быыбардыыр хамыыһыйа чилиэнэ Ксения Лукина кэпсээтэ.
Сардаана Копырина