Бэҕэһээ улууспутугар хас дьиэ аайы үөрүү-көтүү, өрөгөй! Күөх экран, бассаап, телеграм ситимнэр нөҥүө бииртэн биир үтүө сонун тэлэһийэ көттө! Хотугу хоһуун дьоммут өрөспүүбүлүкэтээҕи табаһыттар сүлүөттэригэр 4-с төгүлүн кыайдылар уонна кыайыылаах 1-кы хамаанда сүрүн бириис «Алроса” хампаанньа туруорбут “Урал-вахтовка” массыына хаһаайыттара буоллулар!
3 бочуоттаах миэстэни биһиги улууспут 3 нүөмэрдээх хамаандата ылан, СӨ тыа хаһаайыстыбатын уонна ас-үөл бэлиитикэтин министиэристибэтэ туруорбут бирииһин “Буран” көлө хаһаайына буолла!
Таба сүүрдүүтэ – киһи сэҥээриитин ылар, сүрдээх тыҥааһыннаах күрэхтэһии. Быйылгы тэрээһин олус интэриэһинэйдик, өрө күүрүүлээхтик ааста диэн киин куорат олохтоохторо уонна ыалдьыттара бэлиэтииллэр. Тамайа сүүрэр табалар, араас кыраһыабай таҥастаах-саптаах хотугу дьон, тэтимнээх ырыа, һээдьэ, тыҥааһыннаах сүүрдүүлэр умнуллубат түгэннэри бэлэхтээтилэр. 
Эбээн-Бытантай улууһун 3 нүөмэрдээх хамаандатын кыттааччыта Павел Константинов эр дьоҥҥо 5 км. ырааҕы сыарҕалаах табанан сүүрдүүгэ 1 миэстэни ситистэ. Павел оҕо сааһыттан табаһыт уустук идэтигэр уһуйуллубут, үгүс күрэхтэһиилэр кыайыылаахтара, удьуор утумун илдьэ сылдьар киэн туттар ыччаппыт буолар.
Комбинированнай эстафета кыайыылааҕа Вячеслав Колесов буолла. Вячеслав «Кочевник” аҕа ууһун чулуу табаһыа. Төрүт дьарыгы илдьэ сылдьар, чахчы чаҕылхай ситиһиилэрдээх. Санатан эттэххэ, 2024 сыллаахха Слава үс «Буран” хаһаайына буолан турар. Бу сырыыга Вячеслав эстафета Кыайыылааҕа буолан, ФАПК “Туймаада” туруорбут бирииһэ “Буран” хаһаайына буолла. Эмиэ бу хамаанда кыттыылааҕа Марат Слепцов 2 бочуоттаах миэстэ буолла!
Уучаҕынан сүүрдүүгэ эр дьоҥҥо Алексей Сыроватский 1 миэстэ, кэргэнэ Туйаана Сыроватская дьахталларга эмиэ 1 миэстэни эрэллээхтик ситистилэр. Эбээн-Бытантайтан Сыроватскайдар дьиэ кэргэттэрэ «Көс ыал” күрэскэ кыттыыны ыллылар, бу күрэх түмүгэ тахсарын бары долгуйа күүтэбит, дьоммут инники күөҥҥэ тахсыахтара диэн бигэ эрэнэбит!
Дьахталларга 2,5 км ырааҕы сыарҕалаах табанан сүүрдүүгэ Эбээн-Бытантай улууһун 3 нүөмэрдээх хамаандатын бэрэстэбиитэлэ Варвара Колесова бочуоттаах 3 миэстэни ситистэ.
Жуков аатынан мэтээлинэн уонна «Эр санаа» уордьанынан наҕараадаламмыт биир дойдулаахпыт, анал байыаннай дьайыы кыттыылааҕа, удьуор табаһыт Василий Колесов (Ботохо) сырдык кэриэһигэр аймахтара, доҕотторо таба сүүрдүүтүгэр 7,5 км. муҥутуур кыайыылааҕар 100000 солк. бириис туруорбуттарын абсолютнай чөмпүйүөн, Томпо улууһун ыччата Виктор Слепцов ылла.
Биһиги биир дойдулаахпыт, анал байыаннай дьайыы кыттыылааҕа, элбэх оҕолоох улахан дьиэ кэргэн аҕата, табаһыт Владимир Стручков СӨ Бырабыыталыстыбатын Бэрэссэдээтэлэ Кирилл Бычковтан тыа хаһаайыстыбатын сайдыытыгар сүҥкэн кылаатын иһин Махтал бэлиэтин тутта.
Эбээн-Бытантай улууһа өрөспүүбүлүкэбитигэр саамай эдэр уонна аҕыйах ахсааннаах нэһилиэнньэлээх оройуон диэтэххэ, талба талааннаах дьоннорунан, ыччаттарынан алмаас таастыы килбэйэр! Табаһыттар IV өрөспүүбүлүкэтээҕи сийиэстэрин чэрчитинэн ыытыллыбыт улахан күрэхтэһиигэ биир дойдулаахпыт Дмитрий Саввинов кылаабынай судьуйалаата. Онтон тэрээһин сүрүн комментатора эмиэ бэйэбит уолбут Илья Колесов чуор куолаһынан саҥаран-иҥэрэн, Бытантайдар айдарыылаах дьоммут хоһооннорунан хоһуйан ыытта. Онон, дьоммут, ыччаттарбыт талааннара – сөҕүмэр!
Маны тэҥэ эбээн бытантайдары көрбүт эрэ кэрэхсээтэ. Таҥас-сап астыга, ас-үөл дэлэйэ, кыайыы-хотуу өрөгөйө! Таба сүүрдүүлэрин чаҕылхай түгэннэрин көрбүт дьоллоохтор сүргэлэрэ көтөҕүллэн, хотугулуу тыын күүһүн иҥэринэн астыммыттарын кэпсииллэр. 
Ыалдьытымсах хоту дьонун баай-талым сандалыта туһунан кэрэ кэпсээн буолан, үрдүк хайҕабылы ылла. Өрөспүүбүлүкэтээҕи сүлүөт эгэлгэ астаах сандалытын урбаанньыт Валентина Андросова тэрийдэ. Аптаах астаах асчыт Афанасий Чупров хамаандатын кытары тардыбыт сандалытын амсайбыт эрэ сөхтө-махтайда. Баай, минньигэс сандалылаахтар диэн киэҥ түһүлгэҕэ сылдьыбыттар астына санааларын үллэстэллэр.
Уруй-айхал табаһыттарбытыгар! Туругурда туруҥ, Эбээн-Бытантай аатын!