Саккырыырга Айар дьиэҕэ күннэтэ гитара тыаһын алыптаах доҕуһуола кутуллар. Бу сайыҥҥы куруһуок оҕолоро гитара кылын таарыйдар эрэ дьикти, кэрэ муусуканы оонньотоллор. Кинилэри ырыаны олоҕун аргыһа оҥостубут, талба талааннаах биир дойдулаахпыт Владислав Колесов кэрэ эйгэҕэ сыһыарар, үөрэтэр.
«Быйыл сайыҥҥыттан «Гарпан” этнокултуурунай киин иһинэн үлэлиир «Юный гитарист” диэн куруһуок арыйбыппыт. Куруһуок иитиллээччилэрэ, 9 оҕо бэйэлэрин гитараларын аҕалан, үс бөлөххө арахсан сылдьаллар. Холобур, бастакы бөлөхтөрүм саҥа саҕалааччылар диэн, гитараны кытары билсэн, аккордары буукубаларынан үөрэтэбит. Онтон иккис бөлөҕүм арыый да сатыыр оҕолор, үһүс бөлөххө гитараны баһылаабыт кэнчээри ыччаттар.
Куруһуок иитиллээччитэ Айхал Колесов бу саас дьоҥҥо мас хайытан, үлэлээбит харчытынан саҥа гитара атыылаһан оонньуур. Эргэ гитаратын балтытыгар бэлэх биэрэн, эмиэ ырыа, муусука алыптаах абылаҥар сыһыарар. Бу курдук оҕолор интэриэстэрэ үрдүгэ сөхтөрөр, үөрдэр!
Мин бэйэм сыалым-соругум диэн оҕолорго гитара курдук олус кэрэ доҕуһуоллаах муусука тэрилигэр тапталы иҥэрии буолар. Идэтийбит гитаристар курдук оонньооботорбут даҕаны, гитаранан муусуканы таһаарыы тиэхиньикэтигэр үөрэнэбит.
Бу күннэргэ Үрүҥ Тунах ыһыахпыт ыытыллан, кыратык куруһуокпутун көтүтэн ыллыбыт, аны икки нэдиэлэ кэриҥэ үөрэниэхпит. Оҕолор олус баҕалаахтарыттан астынабын, үөрэбин», — диэн куруһуок салайааччыта, олохтоох мелодист, ырыаһыт Владислав Васильевич сырдатта.
Аныгы үйэ ыччаттара гитаранан оонньуурга чахчы да интэриэстээхтэр. Оҕолор кыратыттан улаханыгар тиийэ гитара доҕуһуолугар ыллаан-туойан, сайыҥҥы иллэҥ кэмнэрин туһалаахтык атаараллар.
Сардаана Копырина