Аллараа-Бытантай нэһилиэгэр сайыҥҥы сынньалаҥнарын кэмигэр табаһыттарга, отчуттарга күүс-көмө буолбут оҕолору чиэстээтилэр.
Тэрээһин кэмигэр ыстаада олоҕун туһунан слайд бэлэмнээн көрдөрдүлэр. Бу манна баар эбээт, үстүү сыарҕаны көлүйэн сиртэн сиргэ көһүү сылаалаах дьаһала, хаһан даҕаны таба диэни көрбөтөх оҕолор сүрдээҕин түргэнник ылынан, туора туран хаалбакка улахан дьоҥҥо көмө-тирэх буолуулара. Сорох оҕолор һуума табаны үүрэн табалаатылар, тугуту имнээһин, табаны эмтээһин, сыарҕа, килиэп буһар оһоҕун оҥоруу буоллун, уу баһыы, мас бэлэмнээһинэ, туһа дьоно буолалларын арылхайдык көрдөрдүлэр. Кэнчээрилэри кытта Кустуур агропрофилированнай хайысхалаах оскуолатын производственнай үөрэтии маастара В.Н. Колесова сылдьан, көрөн-истэн кэлбитин бэлиэтиир тоҕоостоох. Валентина Николаевна үөрэн-көтөн туран, улуус тыатын хаһаайыстыбатын салайааччытын Николай Горохов аан бастаан таба ыстаадатыгар сылдьыбыт оҕолорго ыыппыт грамоталарын үөрүүлээх быһыыга-майгыга туттарда. Манна даҕатан эттэххэ, быйыл биһиги нэһилиэкпититтэн 13 оҕо таба ыстаадатыгар сайылаан, табаһыт ыарахан үлэтин этинэн-хаанынан биллэ, төрүт дьарык мындыр үөрүйэҕэр уһуйулунна.
Быйыл сайын улууспутугар улахан мотуох кэлэн, оттооһуҥҥа биллэр ыарахаттары үөскэтэ сырытта. Нэһилиэкпит оҕолоро, инники кэскиллэрбит отчуттарга көмө буолбуттарын умнар эмиэ сатаммат. Онон, отчут оҕолорбутун эмиэ бэлиэтээн туран, нэһилиэк дьаһалтатын баһылыгын солбуйааччыта Михаил Боярскай грамоталары туттарбыта икки төгүл үөрүүлээх уонна долгутуулаах түгэн буолла.
Мария Саргина, биһиги уопс. кэрр.