Түгэһиир нэһилиэгэр иккис болдьоххо талыллыбыт Сергей Аликов дуоһунаһыгар киирэр сиэрэ-туома «Гарпан» этнокултуурунай киинигэр буолла.
Үөрүүлээх тэрээһин Президиумугар Эбээн-Бытантай национальнай улууһун муниципальнай тэриллиитин Аҕа баһылыга Иннокентий Стручков, Түгэһиир нэһилиэгин баһылыгынан 2005-2016 сылларга үлэлээбит СӨ норуотун хаһаайыстыбатын үтүөлээх үлэһитэ, СӨ үөрэҕириитин туйгуна, Эбээн-Бытантай улууһун бочуоттаах олохтооҕо Руслан Аммосов, Түгэһиир нэһилиэгин дьокутааттарын Сэбиэтин бэрэссэдээтэлэ Ньургуяна Стручкова, Арассыыйа Федерациятын уопсай үөрэхтээһинин бочуоттаах үлэһитэ, СӨ үөрэхтээһинин туйгуна, учууталлар Учууталлара, Эбээн-Бытантай улууһун бочуоттаах олохтооҕо, улуустааҕы үөрэҕирии салалтатын исписэлииһэ Маргарита Слепцова, Түгэһиир нэһилиэгин дьокутаата, улуустааҕы киин балыыһа рентген-лаборана Александр Аммосов, анал байыаннай дьайыы бэтэрээнэ Семен Захаров, Түгэһиир нэһилиэгин Аҕаларын сэбиэтин бэрэссэдээтэлин солбуйааччыта, СӨ мелодистарын сойууһун чилиэнэ, СӨ култууратын туйгуна, Саккырыырдааҕы норуот тыйаатырын режиссера Владислав Колесов, Түгэһиир нэһилиэгин эдэр ыччатын түмсүүтүн чилиэнэ, улуустааҕы үөрэҕирии салалтатын исписэлииһэ Наум Наумов ыҥырылыннылар.
Нэһилиэкпит олоҕор бэлиэ түгэнигэр мустубут дьон Арассыыйа, өрөспүүбүлүкэ, улуус өрөгөй ырыаларын сүһүөхтэрин үрдүгэр туран иһиттилэр.
Салгыы Түгэһиир нэһилиэгин дьокутааттарын Сэбиэтин бэрэссэдээтэлэ Ньургуяна Стручкова нэһилиэк дьокутааттарын аатыттан Сергей Сергеевиһы итиитик-истиҥник эҕэрдэлээн туран, баһылык дуоһунаһын бигэргэтэр быһаарыыны үөрүүлээх быһыыга-майгыга ааҕан иһитиннэрдэ.
Төрөөбүт түөлбэтин, дьонун-сэргэтин туһа диэн баһылыкка туруорунан кыайбыт Сергей Аликов бар дьонун иннигэр андаҕар тылын эттэ. Тэрээһин өссө биир долгутуулаах түгэнинэн Түгэһиир нэһилиэгин дьокутаата Александр Аммосов Сергей Сереевичка түөскэ кэтиллэр Түгэһиир нэһилиэгин баһылыгын Мэҥэ Бэлиэтин туттарбыта буолла. Үтүө үгэһи тутуһан, норуоппут сиэринэн баһылык дуоһунаһыгар киирбит, бар дьонун итэҕэлин ылбыт биир дойдулаахпыт аал уоту оттон, арыылаах алаадьынан айах тутан күндүлээтэ.
Бу үөрүүлээх күҥҥэ солотугар үктэммит баһылыкпытыгар Сергей Сергеевичка Үрдүкү салалта, СӨ Бырабыыталыстыбата, оройуон, нэһилиэк ытык дьоно эҕэрдэ тылларын уонна баҕа санааларын тириэртилэр. Ол курдук, тэрээһини уустаан-ураннаан, иилээн-саҕалаан ыыппыт култуура үлэһиттэрэ Надежда Дьячковская, Татьяна Старостина СӨ Ил Дарханын уонна Бырабыыталыстыбатын дьаһалтатын ис бэлиитикэтин уонна олохтоох бэйэни салайыныы Департаменын салайааччыта Александр Уваров, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов, СӨ муниципальнай тэриллиилэрин Сэбиэтин эҕэрдэ суруктарын туттардылар. Маны тэҥэ Аартыка сайдыытыгар уонна Саха сирин хотугу норуоттарын дьыалаларыгар миниистир Владимир Черноградский, Аартыкатааҕы судаарыстыбаннай агротехнологическай университет ректора, СӨ Ил Түмэн судаарыстыбаннай мунньаҕын дьокутаата Валерий Федоров, СӨ счетнай балаататын аудитора Михаил Никифоров, «Сахатранснефтегаз” АО генеральнай дириэктэрэ Алексей Колодезников, СӨ тыатын хаһаайыстыбатын уонна ас-үөл бэлиитикэтин миниистирэ Артем Александров, «Саха сүөһүтэ” хааһынай тэрилтэтин дириэктэрэ Александр Артемьев, Эбээн-Бытантайга уопуттаах, биллэр-көстөр урбаанньыта Алексей Старостин уонна СӨ муниципальнай тэриллиилэрин баһылыктарын үгүс эҕэрдэ телеграммаларын дорҕоонноохтук ааҕан иһитиннэрдилэр.
Улуус дьаһалтатын уонна тус бэйэтин аатыттан Эбээн-Бытантай национальнай улууһун Аҕа баһылыга Иннокентий Стручков эҕэрдэ, алгыс тылларын анаата: «Бары билэргит курдук, быйылгы быыбар ураты буолла. Ааспыт кэмнэргэ баһылыгы олохтоохтор быһаччы талар буоллахтарына, бу сырыыга саҥа сокуон ирдэбилинэн норуот бэйэтэ итэҕэйэн талбыт дьоно – нэһилиэк дьокутааттара, улахан эппиэтинэһи бэйэлэригэр ылан, Сергей Сергеевиһы иккистээн баһылыгынан таллылар. Биир кэрчик кэм иһигэр Түгэһиир нэһилиэгэ бэйэтин сайдыы суолун булунна, ол эрээри иннибитигэр өссө да улахан сыаллар-соруктар тураллар, саҕаламмыт үлэни тиһэҕэр тиэрдии, олохтоох хаһаайыстыбаны күүһүрдүү, тыа хаһаайыстыбатын өйөөһүн, Түгэһиир нэһилиэгин өссө да тупсарыы уонна эдэр ыччаппытын төрөөбүт сирдэригэр олохсутууга кэскиллээх усулуобуйаны тэрийии. Улуус дьаһалтатын кытта бииргэ тирэх, күүс-көмө буолан, нэһилиэк сайдарын туһугар бииргэ үлэлиэхпит диэн эрэнэбин!»
Түгэһиир нэһилиэгин олохтоохторун ааттарыттан Маргарита Слепцова: “Билиҥҥи уустук балаһыанньаҕа, олох уустук тургутуулаах кэмнэригэр, ыраах сытар, тыйыс тымныылаах, уһун кыһыннаах хоту сир олохтоохторо өбүгэ саҕаттан илдьэ сылдьар, көлүөнэттэн көлүөнэҕэ бэриллэр сиэри—туому, айылҕа суруллубатах сокуоннарын тутуһан, бэйэ-бэйэҕэ көмөлөсүһүү, өйөһүү, үтүө күүстээх санааланыы, тулуурдаах буолуу курдук ураты хаачыстыбалара олох уустуктарын туоруурга күүс-көмө буолар. Эйиэхэ, Аҕа баһылыкпытыгар нэһилиэкпит инники кэскилэ, сайдыыта, олохтоохтор этэҥҥэ буолуулара, ону тэҥэ олоҕу-дьаһаҕы тупсарыы, сайыннарыы эппиэтинэһэ сүктэрилиннэ. Бу ыарахан, ол эрээри олус бочуоттаах суолга эйиэхэ күүстээх санааны, инникигэ эрэли, муударай быһаарыылары уонна эрэллээх хамаанданы баҕарабыт”.
Түгэһиир нэһилиэгин баһылыгынан 2005-2016 сылларга үлэлээбит Руслан Аммосов: “Үтүө киэһэнэн, дьонум-сэргэм! Этэргэ дылы, биһиги 30 тахса сыл бу оройуоҥҥа эдэр сааспыт ааспыт буолан эбээн-бытайтайдары урууларым-аймахтарым, чугас доҕотторум курдук күндүтүк саныыбын. Биһиги дьиэ кэргэҥҥэ күннээҕи кэпсэтии син биир Саккырыыртан саҕаланар, кыһын буоллун, сайын буоллун. Ол курдук биһиги иккис төрөөбүт дойдубутун ахтабыт, таптыыбыт. Нэһилиэк эрэ буолбакка, улуус олоҕун-дьаһаҕын, хайдах туох уларыйыы буолбутун, барытын көрө-истэ олоробут.
Мин Түгэһиир нэһилиэгин баһылыгынан үс болдьоххо үлэлээбитим. Эн хаттаан нэһилиэк баһылыгынан талыллыыҥ бастакы болдьоххо үлэлээбит үлэҥ түмүгэ буолар, нэһилиэнньэ эйиигин дьокутааттарынан нөҥүө өйөөтө, онон, дьонуҥ-сэргэҥ өйүүрүн олох умнумуохха наада. Тыа сирин түөлбэтин баһылыга диэн сүрдээх эппиэтинэстээх үлэ, билиҥҥи үйэҕэ нэһилиэк баһылыгар олус ыарахан кэм, өссө олохпут хайдах буолара биллибэт, онно барытыгар бэлэм буолар гына түмсүүлээх буолуҥ. Бэйэ-бэйэҕэ өйөбүллээх буоллахха ол улахан күүс буолар, оччоҕо ханнык баҕарар кыһалҕаны ааһа көтүөххүт дии саныыбын. Сергей Сергеевич аныгы олох ирдэбилигэр барытыгар сөп түбэһэр, саҥаны, ырааҕы көрөр салайааччы диэн сыаналыыбын”.
Салгыы Сергей Сергеевиһы Түгэһиир нэһилиэгин Аҕаларын сэбиэтин бэрэссэдээтэлин солбуйааччыта Владислав Колесов, анал байыаннай дьайыы бэтэрээнэ Семен Захаров, Түгэһиир нэһилиэгин эдэр ыччатын аатыттан Наум Наумов эҕэрдэлээтилэр. «Гарпан” этнокултуурунай киин дириэктэрэ Раиса Старостина Эбээн-Бытантай национальнай улууһун баһылыгынан үлэлээбит Арассыыйа Федерациятын ОДьКХ туйгуна, бу эйгэҕэ Саха өрөспүүбүлүкэтин үтүөлээх үлэһитэ, Эбээн-Бытантай улууһун бочуоттаах үлэһитэ Гаврил Горохов эҕэрдэ суругун тириэртэ, ону тэҥэ «Гарпан” этнокултуурунай киин уонна тус бэйэтин аатыттан Сергей Сергеевиһы иккис болдьоххо талыллыбытынан итии-истиҥ эҕэрдэтин эппитэ дохсун ытыс тыаһынан доҕуһуолланна.
Нэһилиэкпит баһылыгар Сергей Сергеевичка дьонун-сэргэтин туһа хорутуулаах үлэни баҕарабыт! Түгэһиирбит, үүнэ-сайда тур!
Сардаана Копырина