Бүгүн, атырдьах ыйын 7 күнүгэр, Дьокуускай куорат «Атриум” траурнай саалатыгар биир дойдулаахпытын, анал байыаннай дьайыы кыттыылааҕын, сырдык тыынын толук ууран туран хорсун быһыыны оҥорбут уолбутун Постников Константин Васильевиһы («Номох» диэн позывнойдаах) тиһэх суолугар атаарыы, быраһаайдаһыы буолла.
Биир дойдулаахпыт, хорсун буойун, Дьоруой уолбут Константин Постников сырдык аата өлбөтүн-сүппэтин, үйэлэргэ өлбөөдүйбэтин.
Постников Константин Васильевич
(25.01.1995 – 07.06.2026)
Костя 1995 сыллаахха тохсунньу 25 күнүгэр Кустуур нэһилиэгэр күн сирин көрбүтэ. Оҕо эрдэҕиттэн ханнык да үлэттэн туора турбакка, төрөппүттэригэр күүс-көмө буолара. Кини төрөөбүт нэһилиэгэр орто оскуоланы үөрэнэн бүтэрбитэ. Салгыы Дьокуускай куоракка үөрэнэ барбыта.
Костяны билэр дьоно, доҕотторо, атастара эдэрдии эрчимнээх, бэйэтигэр эрэллээх, дьону кытары түргэнник уопсай тылы булар, бэһиэлэй майгылаах, үлэһит бэрдэ диэн ахталлар. Элэккэй майгылаах буолан элбэх доҕоттордооҕо.
Хоту сир оҕотун быһыытынан бултуурун, балыктыырын, айылҕаны кытта алтыһарын олус сөбүлүүрэ. Маны тэҥэ дьулуһан туран тиэхиньикэни хасыһара.
Костя бу дьыл муус устар ыйыгар күүстээх быһаарыныы ылынан, үгүс саха, эбээн уолаттарын курдук бэйэтин баҕа санаатынан ийэ дойдутун көмүскэлигэр туруммута. Бэс ыйын 7 күнүгэр хорсун буойун, таптыыр кэргэн, эйэҕэс аҕа, эрэллээх доҕор сырдык тыына быстыбыта…
Кыайыыны уһансыбыт, эйэлээх олох иһин олоҕун толук уурбут буойун уолбут килбиэннээх чиэһигэр, эр киһилии эрдээхтик тэлбит суолугар, хорсун быһыытыгар сүгүрүйэбит, махтанабыт! Кини Албан аата үйэттэн үйэҕэ дьоһуннук ааттана, кэлэр көлүөнэҕэ кэпсэнэ туруохтун!