Бүгүн Дьокуускай куоракка «Атриум” траурнай саалаҕа анал байыаннай дьайыыга эйэлээх олох иһин сырдык тыынын толук уурбут биир дойдулаахпытын, гвардия младшай сержанын, ыал тапталлаах оҕотун, амарах аҕаны, истиҥ убайы-бырааты, эрэллээх доҕору Васильев Иван Васильевиһы тиһэх суолугар атаарыы буолла.
Хорсун буойун дьиэ кэргэнигэр, оҕолоругар, аймах-билэ дьонугар, доҕотторугар дириҥ кутурҕаммытын тиэрдэбит. Биир дойдулаахпыт дьоруойдуу быһыыта, Албан аата үйэлэргэ өлбөөдүйүө суоҕа.
Васильев Иван Васильевич
(14.08.1993 – 04.08.2026 с.)
Ваня (Бануу) Васильевтар дьиэ кэргэттэригэр 1993 сыл атырдьах ыйын 14 күнүгэр иккис оҕонон күн сирин көрбүтэ.
Улаатан эрэр тымтык сааһыгар 5-9 кылааска диэри Уус-Алдан улууһун спортивнай оскуолатыгар үөрэммитэ. 2012 сыллаахха Р.И. Шадрин аатынан Саккырыыр орто оскуолатын бүтэрбитэ. 
Ол кэннэ дойдутун иннигэр эр киһи ытык иэһин толорон, аармыйаҕа сулууспалаан кэлбитэ. Дьокуускай куоракка кэргэннэнэн, 2 оҕо амарах аҕата буолбута. Үлэһит бэрдэ, ханнык баҕарар үлэни толлубакка кыайа тутара. Дьокуускай куорат араас таас дьиэлэрин тутууга үлэлээбитэ, Аллараа Дьааҥыттан таас чох тиэйиитигэр суоппардаабыта.
Кини кими да ыарахан кэмҥэ хаалларбат, өрүү көмөлөһө, көмүскүү сылдьар ыраас, сырдык майгылаах буолан, элбэх табаарыстардаах, доҕоттордоох этэ.
2026 сыл саас бэйэтин баҕатынан анал байыаннай дьайыы хантыраагын баттаан барбыта. Хомойуох иһин, атырдьах ыйын 4 күнүгэр сырдык тыына быстыбыта…
Күндү киһибит, быдан дьылларга быраһаай, бырастыы. Эн кылгас, ол эрэн дьоһун олоҕун оҕолоргор салҕаныа, биһиги эйиигин куруук өйдүү-саныы, ахта сылдьыахпыт.
Ийэтэ, бииргэ төрөөбүттэрэ, Старостиннар, Кривошапкиннар, Поповтар, Чириковтар, Павловтар