Слепцов Айтал Степанович Амма улууһун Болугур нэһилиэгэр 2021 сыллаахха олунньу ыйга Майрод Александрович Ноговицын аатынан култуура киинигэр режиссерунан үлэлии кэлбитэ.
Эп-эдэр уол оҕото, үөрэҕин бүтэрэн Амма биир улахан нэһилиэгэр Болугурга үөрэн – көтөн киирэн кэлбитин өйдүүбүт. Саҥа үөрэҕин бүтэрбит оҕо буолан, сүрдээх идейнай, туохтан да толлубат этэ. Олус үчүгэйдик ыллыыра, кэлээт гитара ылан, мин ылааччыбын диэн ырыаларын иһитиннэрбитэ. Бу сыл элбэх тэрээһиннэр ыытыллыбыттара. Ол курдук, 2№-дээх баһаарынай чаас саҥа дьиэтин аһыллыыта буолбута, ону кини олус үчүгэйдик иилээн-салайан ыыппыта. Күһүн, тымныы этэ, Айталга сахалыы комзол, төбөтүгэр дьонтон саарба бэргэһэ уларсаммыт кэтэрдэн, уол оҕото аҕыс кырыылааҕа буола түһэн үөрүүлээх аһыллыыны иккиэ буолан ыыппыппыт. Уһун – киэҥ тэрээһин этэ, кулууп иһигэр торжественнай чаастарын эмиэ ыыппыппыт. Тэрээһин аайы ыытарын ыытан, ыллыырын ыллаан, үҥкүүгэ эмиэ сыһыаннааҕа. Бу сыл улуустааҕы фестиваль күрэҕэр – эбэҥки норуотун сиэрин – туомун тетрализованнай көстүү оҥорон туруорбуппут. Манна Айтал ыччаттары кытары «Дэвэйдэ», «Йоххарье» үҥкүүлэри үҥкүүлээбитэ.
Биһиги култуура кииммитигэр дириэктэри кытары 5 исписэлиис уонна 5 тэхиниичэскэй үлэһит үлэлиибит. Айталбытын биһиги кэлэктиип олус истиҥник саныыбыт. Анал байыаннай дьайыыга барбытын истэн соһуйбуппут, этэҥҥэ эрэ сырыттар диирбит. Биһиги нэһилиэккэ аҕыйах да кэм үлэлээтэр, Айтал дьон өйдөбүлүгэр өрүү үөрэ – көтө сылдьар эйэҕэс майгылаах уол буолан хаалбыта. Кини биһиэхэ толору үс ый үлэлээбитэ. Бүтэн барарыгар айылҕаҕа тахсан атаарбыппыт, өссө һээдьэлээбиппит.
Айталбытын олус истиҥник саныыбыт, ахтан- санаан ылабыт, суох буолбутун истэн олус курутуйдубут, хомойдубут. Бу курдук чаҕылхай, талааннаах ыччаттар баар буоланнар биһиги норуоппутун, Сахабыт сирин атыырдаллар, инники олохпутун көмүскүүллэр. Айталбыт барахсан, уһун уугар сымнаҕастык, сылаастык утуй. Эн көрсүө майгыҥ, истиҥ сыһыаныҥ, мичээриҥ биһиэхэ куруук сүрэхпитигэр сүппэт сырдык өйөдөбүл буолуоҕа.
Амма улууһун Майрод Ноговицын аатынан култуура киинин кэлэктиибэ