Кустуур нэһилиэгэр олус бэртээхэй тэрээһин – нэһилиэкпит аҕам саастаах дьонугар аналлаах истиҥ көрсүһүү буолла. Дьоһун саастарыгар үктэммит ытыктабыллаах дьоммут саҥа сылы көрсөн, үөлээннээхтэрин кытары мустан, итии чэй иһэн сэһэргэстилэр, оонньоон, үҥкүүлээн сэргэхсийдилэр.
Бу күн оруобуна улууспут ытык кырдьаҕаһа Ульяна Николаевна Никитина 87 сааһын томточчу туолбутун бары эҕэрдэлээн, урукку сэбиэскэй кэмнээҕи кэмнэри ахтыһан, ирэ-хоро кэпсэтэн сылаанньыйдылар, сэмэй бэлэхтэри үөрэ-көтө туттаран истиҥник үөрдүлэр.
Аҕам саастаах дьоммут баян доҕуһуолун дьүрүскэнигэр, ааспыт кэм ахтылҕаныгар уйдаран, ыллам ырыа бөҕө ылланна, үҥкүү-битии дэлэйдэ. Нэһилиэкпитигэр биллэр баянист Афанасий Фокович Слепцов баянын доҕуһуола барыларын сэргэхситтэ. Ыллыыр куттаах Анисья Алексеевна Тарабукина, Александра Николаевна Сыроватская күүстээх куоластара кутуллан киһи бары тэҥҥэ ыллаата.
Сытар да сылаалаах, киһи эт-хаан өттүнэн эрэ буомурбат, өй-мэйии эмиэ мөлтүүр. Сааһырбыт киһи тайахха да өйөннөр, дьон-сэргэ ортотугар бэйэтин үөлээннээхтэрин кытта кэпсэтэн, сэһэргэһэн, санаа атастаһан, кыралаан хааман-сиимэн, хамсанан, ыллаан-туойан сылдьара олоххун сэргэхситэр, санаа баттыгыттан ыраастыыр, доруобуйаҕын тупсарар.
Ол сиэринэн биһиги нэһилиэкпитигэр аҕам саастаах дьоммутугар сөптөөх болҕомто ууруллан, эргэ Саҥа дьылбытын сүрдээх сэргэхтик бэлиэтээтибит. Афоня доҕуһуоллатар ахтылҕаннаах баян тыаһа, Александра күүстээх кэрэ куолаһа, улуус кииниттэн кэлбит хореограф кыыс эрчимнээх үҥкүүтэ, бэйэбит уолбут Миша Сотрудников киһи дууһатын таарыйар ырыалара, барыгытыгар барҕа махтал!
Тамара Шадрина, биһиги уопс. кэрр.