Кустуур нэһилиэгэр Аҕам саастаах дьон аан дойдутааҕы күннэрин итии чэйдээх сандалы тула түмсэн көрүстүлэр.
Күндү кырдьаҕастарбыт үөлээннээхтэрин көрсөн сэргэхсийэн, истиҥник сэһэргэһэн, кэпсэтэн, күлэн, оонньоон күннэрин атаардылар. Бу күн элбэх эҕэрдэ тыл этилиннэ, ылбаҕай ырыа ылланна, оонньуу-көр, үҥкүү-битии оройуттан тутулунна.
Нэһилиэкпит саамай кырдьаҕас олохтооҕо, 93 саастаах тыыл бэтэрээнэ Христина Егоровна Горохова дьонугар-сэргэтигэр эҕэрдэтин, алгыс тылын тиэртэ, хоһоон тылларын умнубакка эрэ хомоҕойдук этэн сэргэхситтэ.
«Аартык» бөлөх эбээлэрэ түмсэн, чөл олоҕу көҕүлээн спортка, дьарыкка туһааннаах, эҕэрдэ тэтимнээх үҥкүүлэрин көрдөрбүттэрэ олус биһирэннэ. Эбээлэрбит араас хамсаныылары сүүрэн-көтөн, ойон-тэбэн, ыстанан бэрткэ оҥороллоро сөхтөрдө.
Бэлиэ түгэни чиҥэтэн, нэһилиэкпит 70, 75 саастарын туолбут ытык-мааны кырдьаҕастарыгар үбүлүөйдээх саастарынан эҕэрдэлээн туран, сертификаттары бэлэх уунан туттарбыттара дохсун ытыс тыаһынан доҕуһуолланна.
Бу күн ытыктабыл уонна үгэс быһыытынан сыл аайы бэлиэтэнэр. Атын тэрилтэлэргэ эмиэ аҕам саастаах дьон күннэрин бэлиэтээн тэрээһиннэр ыытылыннылар.
Биһиги кырдьаҕастарбыт дьоһуннук нус-хас олороллорун туһугар өрөспүүбүлүкэ салалтатын социальнай бэлиитикэтин биир сүрүн хайысхатынан буолар. Төрөөбүт-үөскээбит улуустарын сайдыытыгар үгүс кылааттарын киллэрэн үлэлээбит үлэлэрин үрдүктүк сыаналыыбыт.
Маны таһынан бу үтүөкэн күн биһиги нэһилиэкпит ытык-мааны кырдьаҕас ыалларын Татьяна Петровна уонна Афанасий Николаевич Гороховтары 50 сыл устата өйдөһөн-өйөһөн, ыал буолан бииргэ олорбуттарынан итиитик-истиҥник эҕэрдэлээтилэр! Кинилэргэ өрөспүүбүлүкэбит Ил Дархана Айсен Николаев, улуус аҕа баһылыга Иннокентий Стручков, Кустуур нэһилиэгин баһылыга Роберт Колесов эҕэрдэ суруктарын үөрүүлээх быһыыга-майгыга туттардылар. Нэһилиэкпит тумус туттар сис ыаллара Гороховтар элбэх оҕону төрөтөн, иитэн-такайан, үөрэттэрэн, үлэһит дьон оҥортоон, үйэ аҥара иллээхтик-эйэлээхтик олорбуттарын бэлиэтээн, олохтоох дьаһалта 50 тыһ. солк. сертификаты бэлэх туттарда!
Өссө биир үөрүүлээх түгэнинэн нэһилиэкпит ытык-мааны ыалыгар Анастасия Афанасьевна уонна Иван Васильевич Старостиннарга «Таптал уонна бэриниилээх буолуу» үрдүк бэлиэни туттарыы буолла! Ыал буолуу, олох суолун устун бииргэ хаамыы – киһи аймах орто дойдуга кэлбит ытык иэһэ буолар. Старостиннар дьиэ кэргэттэрэ сырдык аналларын дьоһуннук толорон, үлэни, үөрэҕи өрө тутан, биһиги бары киэн туттар, холобур оҥостор дьоһун дьоммут буолаллар.