Аллараа-Бытантай нэһилиэгэр сайыҥҥы былааннаммыт үлэлэр сыыйа-баайа ыытыллаллар.
Нэһилиэкпитигэр улахан тутуу – саҥа хочуолунай тутуута, ититэр ситимин тардыы барар. Манна икки биригээдэ кэлэн үлэлии сылдьар, үлэ күөстүү оргуйар. Билигин хочуолунай акылаата түһэн бүтэн эрэр, кэлэр нэдиэлэҕэ түмүктээн салгыы сүрүн каркаһын тутуутугар киирэллэр. Онно сиэри-туому тутуһан, арыылаах алаадьыннан сирбитин аһатыахпыт. Онтон ититэр ситим тардыытыгар атахтарын туруоран бүтэрэн, турбаларын уураннар, сыбаарка үлэтигэр киирбиттэрэ. Биригээдэ үлэһиттэрэ “бэрткэ үлэлии сылдьабыт, нэһилиэнньэ утары баран көмөлөһөр” дииллэр. Саҥа хочуолунай үлэҕэ киирдэҕинэ үлэ миэстэлэрэ тахсыа этилэр.
Нэһилиэк баһылыга Роберт Колесов: «Хочуолунай тутуутугар икки биригээдэ баар. Биир хочуолунай тутааччылар, иккис ититэр ситими оҥорооччулар. Үлэ-хамнас бөҕө барар турар. Күһүн хочуолунайбыт үлэҕэ киириэ диэн эрэллээхпит».
Саҥа үлэлии кэлэр исписэлиистэргэ анаан 4 кыбартыыралаах дьиэ тутуутугар аукцион таҕыста. “Урут үлэлээн испит биригээдэ аукциоҥҥа кыттыахтаах. Матырыйаала барыта тиэллибитэ. От ыйыгар тутааччылар кэлэн быйыл бу дьиэбит үлэҕэ киириэхтээх,” – диэн Роберт Афанасьевич сырдатта.
Бу дьиэ үлэҕэ киирдэҕинэ хоту ыраах сиргэ үлэлии кэлэр исписэлиистэргэ олорор усулуобуйа баар буолуоҕа.
Суолбут эмиэ сыл аайы өрөмүөҥҥэ наадыйар. Онно сайын аайы тупсарыныы бырагырааматын чэрчитинэн суол дьаамаларын толорон көннөрүү, астарыы үлэлэрэ барар. Уу тиэйэр суолу эмиэ көннөрүөхтэрэ, туоруур муостаны сөргүтүөхтэрэ.
Маны тэҥэ ойуур баһаарыттан сэрэхтээх буолууга минерализованнай балаһаны саҥардан астарыы үлэтэ барар.
Тыа сиригэр олорор дьоммут-сэргэбит олоҕун уйгута тупсарыгар тустаах үлэ барар. Аныгы кэм тэтимэ түргэн, олохпут хаамыыта ахсым ат айаныгар тэҥнээх. Ону кытта тэҥҥэ барсан иһэрбит үүнүү-сайдыы бэлиэтэ.