Бэс ыйа итиитинэн илгийэр, сылааһынан сыдьаайар. Сылаас күннэри баттаһа Үөһээ-Бытантай нэһилиэгэр былааннаммыт сайыҥҥы үлэлэр саҕаланнылар.
Бэс ыйын 1 күнэ – Оҕо күнэ. Бу күн “Дюбун” ЭКК тэрийиитинэн оҕолорго анаан “Косплей на героев мультфильмов” күрэх уонна “Көрдөөх стартар” оонньуу ыытылыннылар. Оҕолор бэйэлэрин сөбүлүүр мультиктарын геройдарын таҥаһын-сабын, майгытын уобарастаан, ыллаан-туойан көмүскээтилэр. Бу күрэххэ элбэх оҕолоох дьиэ кэргэн кыракый кыттааччылара бириистээх миэстэҕэ тиксэн, минньигэс бириистэри тутан үөрдүлэр.
Ол кэннэ, дьэ, тыҥааһыннаах көрдөөх сүүрүүлээх-көтүүлээх оонньууга 12 саастарыттан 2 саастарыгар диэри оҕолор хамаандаҕа хайдыһан оонньоон, кыайан-хотон, үөрэн-көтөн тэрээһиммит түмүктэннэ.
Бэс ыйын 3 күнүттэн “Күнчээн” оҕо сынньалаҥ лааҕыра үлэтин саҕалаата.
“Бөһүөлэкпитигэр түөлбэлэринэн ыраастаныы үлэтэ олус тэрээһиннээхтик ыытылынна. Эргэ эбийиэги көтүрэн, “Олохтоох көҕүлээһиннэри өйөөһүн” бырагыраама бырайыагар кыайбыт “Оҕо сынньанар, оонньуур площадката” тутуутун миэстэтин таһаардыбыт. Нэһилиэк аҕаларын көмөтүнэн сайын таҥыллан, күрүөтэ оноһуллан туруоҕа”, — диир нэһилиэк баһылыга Лев Горохов.
Салгыы тэрилтэлэринэн сайын туох үлэлэр ыытыллалларын туоһулаһан, салайааччылары көрсөн кэпсэттим.
С.М. Иванов, оскуола дириэктэрэ: “Бу сайыҥҥы кэмҥэ оскуолаҕа уонна уһуйааҥҥа косметическай өрөмүөннэр барыахтара. Быйылгы сүрүн сыалбытынан оскуолабытын сылытыы үлэтэ буолар. Сылын аайы бу үлэбит былаанынан барар. Былырыын тепловентилятордары туруоран арыый сылаастык кыстаатыбыт. Ол гынан баран, муостатынан тымныы. Ол иһин, быйыл харчы көрдөрөммүт матырыйаал ылыллан кэлбитэ. Күһүн муостатын өрөмүөннээн оҥоруохпут. Оскуолабытыгар уонна спортивнай саалга экономия оҥорон, теплосчетчик туруортаран гаражпытын уонна мастарыскыайбытын бүөлэниэхтээхпит. Командировкаҕа киһи кэлиэхтээх. Оҕолор эбии дьарыктарыгар туспа здание ыламмыт, мастарыскыайы үлэҕэ киллэрбиппит. Ону баһаары сэрэхтээх буолууга уонна үөрэхтээһин ирдэбиллэригэр эппиэттиир гына оҥоруохтаахпыт. Сэрэхтээх буолуу ирдэбилинэн саалга батареялары сабан щит оҥорон туруоруохпут”.
М.П. Баишева: “Быйыл ынах, биэ төрөөһүнэ үчүгэй. Дьон-сэргэ түргэнник ситэр хаһаайыстыбаны сэргээн, 12 ыал холбоон 138 кууруссаны сакаастаан олорор. Аһа-үөлэ толору тиэллэн кэлбитэ. Бэс ыйын ортотугар кууруссалары аҕалалларын күүтэбит”.
Т.П. Петрова: “Кулууппутугар быстах өрөмүөннэр барыахтара: аан уларытыыта, батарея эбиитэ, кыладыапка оҥоһуута”.