Туймаада ыһыаҕар улууспут түһүлгэтигэр биир дойдулаахтарбыт түмсэннэр, маанылаах сандалы аһыттан амсайан, сүрдээх сэргэх тэтимнээх кэнсиэр көрөн, санааларын атастаһан, ирэ-хоро кэпсэтэн олус астынан тарҕастылар.
«Тэрээһини биир дойдулаахпыт Ньургуша уонна күүс-көмө буолар чугас дьоно Айаал Протодьяконов, Сардана-Көмүс буолан ыллаан-туойан, оонньотон олус сэргэхтик ыыттылар. «Гарпан” этнокултуурунай киин айымньылаах үлэһитэ Мария Аммосова эбээннии сиэри-туому толордо, уопсай култуурунай тэрээһиҥҥэ үлэлээтэ.
Лилия Тарабукина оһуохайдаан, Аурика Стручкова, Ньургуяна Потапова һээдьэ этэннэр дьону түмтүлэр.
Кэнсиэргэ биир дойдулаахтарбыт Сарыал Мушников — Күн Уолан, Михаил Рожин — Оталан, Николай Никифоров, Ньургуяна Потапова, Ольга Попова, Надя, Варвара Мигалкиналар, Ирина Степанова, Уруйдана Слепцова, “Умсулҕан» ырыа бөлөҕө, «Гиркилен” үҥкүү бөлөҕө кытыннылар.
Түһүлгэбит Элина Гузаирова, Мария Аммосова уран тарбахтарынан айыллыбыт панноларынан, оҥоһуктарынан киэргэннэ. Ас-үөл өттүн дьаһайбыт Валентина Семеновнаҕа, Афанасий Владимировичка, Изабелла Гаврильевнаҕа туһунан улахан махтал буолуохтун! Дьону-сэргэни тото-хана маанылаах аһынан күндүлээн, ыһыах күнүгэр умнуллубат, чаҕылхай түгэннэри бэлэхтээтилэр.
Тэрээһин сүрүн тэрийээччилэригэр — улуус дьаһалтатыгар, баһылык Стручков И.Н,, оройуоммут бэрэстэбиитэлигэр Старостин К.И., урбаанньыт Андросова В.С., көрдөөх-нардаах Ньургушаҕа, Дьокуускай куоракка олорор биир дойдулаахтарбыт түмсүүтүгэр Стручкова А.Д., Дьокуускай куоракка олорор биир дойдулаахтарбыт барҕа махтал тылларын тириэрдэллэр,” – диэн Эбээн-Бытантайдааҕы култуура салалтатын салайааччыта Степан Слепцов сырдатта.
«Туймаада хочотугар Үс Хатыҥ сиригэр куорат ыһыаҕар сыллата куоракка олорор биир дойдулаахтарыгар анаан сиэри-туому тутуһан ыһыах ыһаллара олус үөрүүлээх түгэн. Түһүлгэҕэ кэлбит дьон быйыл ханнык да сыллардааҕар ыһыахпыт олус үчүгэйдик тэриллэн ааста дииллэр.
Бу күн үбүлүөйдээх дьоҥҥо өйдөбүл грамота туттарыллыбыта олус долгутуулаах түгэн буолла.
Эбээн Бытантайтан төрүттээх куоракка олорор дьон — сэргэ аатыттан уонна тус бэйэм ааппыттан улуус дьаһалтатыгар, чуолаан Иннокентий Николаевичка, Константин Старостиҥҥа барҕа махталбытын тиэрдэбит, үлэҕит сыаналана турдун, ситиһиигит үксээтин диэн алгыыбыт. Иннокентий Николаевич бэйэтэ сүүрэн-көтөн, тэрийсэн, эрчимнээх эдэр киһи буолара биллэр диэн биир дойдулаахтарбыт астынан, үөрэн санааларын үллэстэллэр.
Тустаах дьон эмиэ маннык биһирэбили этэллэр:
Эбээн Бытантай национальнай улууһун баһылыгар Иннокентий Николаевич Стручковка уонна Валентина Семеновна Андросоваҕа Дьокуускай куоракка Үс Хатыҥ туонатыгар, Эбээн Бытантай түҺүлгэтигэр киэҥ бырагыраамалаах, ыллам ырыалаах-тойуктаах бырааһынньыгы тэрийэн бар дьоҥҥутун Улуу Тунах ыһыаҕынан баай астаах сандалы тэрийэн, төрөөбүт төрүт аспытынан биир дойдулаахтаргытын, аймах-билэ дьоҥҥутун күндүлээбиккитигэр барҕа махтал! Өссө даҕаны дьоҥҥутун-сэргэҕитин өрүү үөрдэ сылдьыҥ!
Быыстапка тэрийээччилэригэр Элина Егоровна Гузаироваҕа , Мария Ивановна Аммосоваҕа олус диэн түһүлгэни киэргэппит оҥоһуктарын иһин махтанабыт.
Нюргушаҕа дьон маннык диэн махталларын тиэрдэллэр: Ньургуяна олох бэрткэ ыытта, бэйэтин эрчиминэн дьону көҕүлээтэ, кэлэн ыллаабыт ырыаһыттар, үҥкүүлээбит үҥкүүһүттэр дьону-сэргэни үөртүлэр! Махтал буоллун барыгытыгар!
Маны тэҥэ мааны астаах асчыттарбытыгар Валентина Семеновнаҕа, Афанасий Владимировичка махтал мааныта буоллун, олох тулуурдаах үлэни ыыттылар, астара минньигэһэ, өлгөмө киһини сөхтөрөр,” – диэн Дьокуускай куоракка олорор биир дойдулаахтарбыт түмсүүлэрин салайааччыта Аурика Стручкова махтал, алгыс тылларын эттэ.
Сардаана Копырина