Түгэһиир нэһилиэгэр ыытыллыбыт аҕам саастаах дьон Үрүҥ Тунах ыһыахтарыгар Горнай улууһуттан төрүттээх, Саккырыырга тутулла турар атыы-эргиэн киинин тутуу биригээдэтин эдэр үлэһитэ Егор Николаев бар дьону ыһыаҕынан итиитик-истиҥник эҕэрдэлээн туран, ылбаҕай ырыатын бэлэх уунна.
Егор олус үчүгэйдик ыллыырын тэҥэ уу сахалыы хомоҕой тыллаах эдэр киһи буолан биэрдэ. Саха оҕото ыһыахтары ахтыбытын, онон үөрэ-көтө тэрээһиҥҥэ кэлбитин туһунан эттэ. 
— Эбээн-Бытантай улууһугар атыы-эргиэн логистическай киинин тутууга үлэлии сылдьабын. Үлэбит ортолоото, аны күһүн атырдьах ыйын бүтэһигэр бүтэрэбит диэн былаанныыбыт. Күн-дьыл туран биэрдэҕинэ, мэһэйдээбэтэҕинэ бүтэриэхтээхпит уонна күһүн бу улахан эбийиэк үлэҕэ киириэхтээх.
Эбээн-Бытантай сирин-уотун, үрдүк хайаларын сөбүлээтим, киһи кута-сүрэ тохтуур үчүгэй дойду, дьоно-сэргэтэ да аламаҕай! Үрэххэ балыктыы бара сылдьыбыппыт. Биһиги, улахан балыксыттара суох дьон , онтон-мантан күөгү уларсан, баран балыктаан, аҕыйаҕы хаптарбыппыт.
Бэйэм ыллыырбын олус сөбүлүүбүн. Ырыа – олоҕум аргыһа диэтэхпинэ сыыспатым буолуо. Ол да иһин, бэҕэһээ култуура үлэһиттэрэ аҕам саастаах дьон ыһыаҕар ыллыан дуо диэн көрдөспүттэрин быһа гыммакка, ытык-мааны кырдьаҕастарга ылбаҕай ырыабын бэлэх ууннум.
Түгэһиир нэһилиэгин ытык кырдьаҕастарыгар, бэтэрээннэригэр Үрүҥ Тунах ыһыаҕынан сүһүөхтээх бэйэм сүгүрүйэн, хоолдьуктаах бэйэм хоҥкуйан тураммын итиитик-истиҥник эҕэрдэлиибин! Баҕарыам этэ ыстаал курдук кытаанах доруобуйаны, күн курдук күлүмүрдүү, үөрэ-көтө сылдьыҥ.
Сардаана Копырина