Туймаада хочотун уйгулаах ыһыаҕар ыытыллыбыт «Маанылаах түһүлгэ» күрэскэ ыраахтан-чугастан кэлбит өрөспүүбүлүкэбит оройуоннара бэрткэ диэн бэлэмнэнэн, түһүлгэлэрин киэргэттэн, дэлэй ас-үөл астанан, саха Ытык күнүн дьоһуннук көрүстүлэр.
Күрэскэ бастакы үрдэл кыайыылааҕа Амма улууһун түмсүүтэ буолла уонна 100 тыһ. уу харчынан сэртипикээти тутта! Иккис үрдэл — Чурапчы улууһун түмсүүтэ, 70 тыһ. харчынан сэртипикээт ылла. Үһүс үрдэл — Анаабыр улууһа, 50 тыһ. харчынан сэртипикээт туттарылынна. Онтон биһиги, Эбээн-Бытантай улууһун түһүлгэтэ, «Байылыат түһүлгэ» анал аат хаһаайына буолла уонна 20 тыһ.харчынан наҕараадаланна!
«Туймаада хочотун ыһыаҕар, ытыктанар Үс Хатыҥ сиригэр «Байылыат түһүлгэ» диэн ааты ылар улахан сыанабыл! Урбаанньыт Валентина Семеновнаҕа, минньигэс астаах Афанасий Владимировичка, кыргыттарга, бары үлэлэспит дьоҥҥо улахан махтал, эҕэрдэ буолуохтун!» — диэн улуус баһылыга Иннокентий Стручков махтанна.
«Эбээн-Бытантай түһүлгэтэ истиҥ-иһирэх кэнсиэринэн, баай-талым остуолунан көрүстэ. Түһүлгэҕэ хаһааҥҥытааҕар да элбэх киһи мустан биир дойдулаахтары түмтэ, дьон-сэргэ сынньанан, астынан тарҕаста. Ханнык да түһүлгэ итинник баай-талым остуолу тарпытын көрө иликпин — таба тылыттан, дьарҕааттан саҕалаан эмис убаһа иһигэр, этигэр тиийэ. Ыһыах дьиҥ суолтатын кинилэр тиэртилэр. Сылдьыбыт ыалдьыттар, урут үлэлээбит ыаллыы дьааҥылар сөҕөн-махтайан махталларын тиэртилэр. Улуус баһылыгар Иннокентий Николаевичка, «Түмсүү” хамаандатыгар Валентина Семеновнаҕа, Афанасийга, култуура үлэһиттэригэр, бырааһынньыгы олус үчүгэйдик иилээбит-саҕалаабыт Ньургушаҕа, улуус бэрэстэбиитэлэ Старостин К. В. о. д. а . истиҥ махталбытын тиэрдэбит. Ханнык баҕарар салайааччы саамай сыаналанар хаачыстыбата — дьону түмүү уонна норуокка истиҥ сыһыан. Инникитин да түмсүүлээх, сайаҕас санаалаах, инникигэ дьулуурдаах буола туруҥ! Дойдубут үүнэ-сайда туруохтун!», — диэн биир дойдулаахпыт Наталья Попова санаатын үллэһиннэ.
Сардаана Копырина