Дьокуускай куораттан кэлбит 11 исписэлиистэн турар оҕо быраастарын биригээдэтэ биир нэдиэлэ устата оҕо аймах доруобуйатын туругун көрдүлэр-иһиттилэр, сүбэ-ама биэрдилэр.
Элбэх хайысхалаах оҕо быраастарын биригээдэтэ, бастатан туран, уустук суоллаах-иистээх кытыы нэһилиэктэргэ Кустуурга, Дьарҕаалаахха үлэлээтилэр. Онтон улуус киинигэр Саккырыырга кэлэн, үс күн устата оҕолор доруобуйаларын тургуттулар.
«Мобильнай биригээдэҕэ тоҕус быраас, о.э. педиатр, харах бырааһа, лор, эндокринолог, кардиолог, гинеколог, УЗИ бырааһа, невролог, психиатр уонна икки орто медперсонал – регистратор, лаборант буолан, биир нэдиэлэ устата үлэлээтибит.
Кустуурга 88 оҕону, 1 улахан киһини, Дьарҕаалаахха 39 оҕону, 1 улахан киһини, Саккырыырга 248 оҕону, уопсайа 377 киһини хабан көрдүбүт-иһиттибит. Чинчийии түмүгүнэн бастакы миэстэҕэ харах ыарыыта, иккис – ис-үөс, үһүс – эндокриннай ыарыылар (уойуу) бэлиэтэннилэр,» — диэн педиатр-быраас Анжелика Матвеева сырдатта. 
Бэлиэтээн эттэххэ, “Мобильнай биригээдэлэр өрөспүүбүлүкэтээҕи кииннэрэ” бырайыак Саха өрөспүүбүлүкэтин Ил Дархана Айсен Николаев көҕүлээһининэн иккис сылын үлэлиир. Бу кэм устата хотугу улуустар олохтоохторо ыраах айаннаабакка миэстэтигэр көрдөрүнэр кыахтаннылар.
Сардаана Копырина