Хоту сиргэ олох-дьаһах араас эйгэтигэр тустаах исписэлиистэр тиийэн үлэлииллэрэ хаһан баҕарар үөрүүлээх. Уустук усулуобуйаттан, тыйыс айылҕаттан, чиэски сытарыттан толлубакка үлэлии кэлэр дьон баай уопуттарын үллэстэллэр, эдэр өттүлэрэ сэргэхсийиини таһаараллар.
Саҥа үөрэх дьыла саҕаланыыта «Хаарчаана” оҕо уһуйаана икки саҥа үлэһиттэннэ. Онон, күндү ааҕааччыларбыт, кэнчээри ыччаппытын кытары үлэлиир дьоммутун билсэн кэбиһиҥ.
Виталина Викторовна Петрова, эдэр исписэлиис, иитээччи:
— Мин бииргэ төрөөбүт 11 оҕоттон иккис улахан кыыстара буолабын. Бэйэм Сунтуур улууһуттан төрүттээхпин. Бу сайын Дьокуускайдааҕы педагогическай кэллиэһи бүтэрдим.
Үөрэххэ киириэхпиттэн хоту бара сылдьыахпын баҕарбытым. Ол иһин үһүс кууруска үөрэнэ сылдьан үлэ көрдөнөр кэммитигэр «Вакансиялар дьаарбаҥкалара» диэн тэрээһиҥҥэ сылдьан бу хоту Саккырыыр диэн дэриэбинэҕэ иитээччи көрдүүллэр диэн этэ, онно резюмебын биэрбитим. Ол кэннэ манна балаҕан ыйын 1 күнүгэр кэлбитим. Сарсыныгар 21 сааспын туолбутум.
Миигин Эбээн-Бытантайга олус үчүгэйдик көрсүбүттэрэ. Сөмөлүөттэн уһуйаан сэбиэдиссэйэ Марина Васильевна бэйэтэ кэлэн көрсүбүтэ уонна дэриэбинэни кытта билиһиннэрбитэ, ханна улэлиирбин, туох ханна баарын, олорор дьиэбин көрдөрбүтэ. Дьиэ булбуттара, ол дьиэҕэ миигин кытары Лена Николаевна буолан олоробут, кини Саккырыырга уһуйааҥҥа муусука дьарыгын салайааччытынан кэлбитэ. Кинилиин иккиэн биир дьиэҕэ сөпсөһөн олоробут.
Үчүгэй кэлэктиипкэ түбэспиппин дии саныыбын, тугу эмит өйдөөбөтөхпүнэ бары көмөлөһөллөр. Уонна айылҕаҕыт олус кыраһыабай, кэрэ!
Аан бастаан кэлиэм иннинэ олох билбэт сирбэр баран эрэрбиттэн, билэр дьоннорум да суох диэн куттаммытым. Онтон манна кэлэн баран ол куттанарым суох буолбута.
Лена Николаевна Лобанова, муусука дьарыгын салайааччыта:
— Мин кэрэ айылҕатынан аатырбыт кыыс Амма сириттэн сылдьабын. Благовещенскайдааҕы култуура, хореография салаатыгар үөрэммитим. Үөрэхпин бүтэрэн баран Амма улууһун биир улахан нэһилиэгэр култуурунай сынньалаҥ киинигэр дириэктэринэн үлэлээбитим. 28 сыл үлэлээн баран Дьокуускай куоракка көспүтүм. Кэлин орто саастаахтарга Өксөкүлээх Өлөксөй аатынан киин иһинэн үлэлиир «Саха эйгэтэ» уопсастыбаннай тэрилтэ «Махтал» үҥкүү ансаамбылыгар хореограф туруорааччы быһыытынан үлэлээбитим. Бэйэм ситиһиилэрим муҥура суох. Ол курдук тас дойдуларга Польшанан, Монголиянан, Москубанан араас куораттарынан хас да төгүллээх Гран-При хаһаайыннара буолбуппут. “Дьокуускай куорат култууратын сайдыытыгар кылаатын иһин”, СӨ култууратын туйгуна уонна да атын бэлиэлэр, грамоталар, махтал суруктар туоһулууллар.
Биир дойдулааҕым, логопед, уйулҕа үөрэхтээҕэ, иитээччи Саргылана Степановна Захарова эһиги дойдугутугар былырыыҥҥыттан кэлэн таһаарыылаахтык үлэлии-хамсыы сылдьар. Мин бэйэм уруккуттан хоту улууска баран үлэлиир санаалаах, атын дойдуну көрөр-истэр, үөрэтэр былааннардаах этим. Эбээн Бытантай улууһугар «Хаарчаана” оҕо уһуйаныгар үлэ миэстэтэ тахсыбытыгар ыҥырбыттарыгар кэлбитим.
Аан бастаан көтөн кэлэн баран салгынныын үчүгэйин билбитим, үөрэ-көтө көрсүбүттэриттэн наһаа үөрбүтүм, билбэт, хаһан да сылдьыбатах дойдубар олус истиҥник, эйэҕэстик көрсүбүттэригэр махтанабын!
Ханнык баҕарар дойдуга үлэлиир сир усулуобуйатын төһө кыалларынан оҥоро сатыыллар, онон уһуйаан сэбиэдиссэйигэр Марина Васильевнаҕа махталым улахан!
Бэйэм инники баҕа санаам кырачаан иитиллээччилэри үөрэтэн-такайан, кэрэ эйгэтигэр уһуйуллан, үрдүктэн үрдүк ситиһиилэри ылалларыгар, нэһилиэк олоҕор эдэр ыччакка күүс-көмө буолан, бэйэм баай уопуппуттан бэрсэн, инники кирбиилэргэ сылдьыахтарын баҕарабын!
Сардаана Копырина