Оскуола иннинээҕи саастаах оҕону түргэн толкуйга, ону тэҥэ төрөөбүт дойдуларын устуоруйатын билиилэригэр, тапталы, сайдам санааны үөскэтии оонньуу нөҥүө ыытылыннаҕына оҕо түргэнник ылынар.
Уһуйаан иитээччилэрэ маны таба өйдөөн, кэккэ сылларга толкуйдаан таһаарбыт оонньуулара, ааспыт сылга улуус баһылыга Иннокентий Стручков өйөбүлүнэн оҥоһуллан таҕыстылар. Бу оонньуулар барыта, эбээннии матыыптаах, төрөөбүт сирдэрин айылҕатын, кыылларын, кэрэ сирдэрин кэрэһэлиирэ кэрэхсэбиллээх.
Ол курдук, Евдокия Тоскина уонна Амгаяна Бочкарева «Наша малая Родина-Эвено Бытантайский национальный улус» домино, Марина Верховская «Мой Эвено — Бытантай» — развивающая тетрадь, Люция Рожина «Дорҕоон лотота», Мария Никитина «Мин төрөөбүт дойдум», Анисия Голикова уонна Мария Корнилова «Кочевая семья», Мария Корнилова «Инэньгидэ тор-мин бугу» диэн, бэртээхэй оонньуулар киэҥ эйгэҕэ таҕыстылар. Бу оонньуулары дьиэ кэргэнинэн да оонньуурга олус табыгастаахтар, интэриэһинэйдэр. «Олунньу ыйга Дьокуускай куоракка Арктика улуустарын уһуйааннарын үлэһиттэригэр семинар ыытыллар. Биһиги манна кыттыыны ыламмыт, бу оонньууларбытын киэҥ эйгэҕэ билиһиннэриэхпит, таһаарыахпыт. Түгэниэн туһанан, улууспут баһылыгар Иннокентий Николаевичка, солбуйааччытыгар Александра Ивановаҕа улахан махталбын этэбин. Кинилэр үбүлээһиҥҥэ өйөбүллэрэ суох, бу оонньууларбытын кыайан таһаарбаппыт. Хас биирдии оонньуу 10 экземплярынан “РекТайм” тэрилтэҕэ оҥоһуллан таҕыстылар, онон хас биирдии бөлөххө тиийэр. Иитээччи үлэтигэр, тус идеяларыгар болҕомто үлэ үтүө түмүгүн эрэйэр. Биһиги уһуйааммытыгар маныаха санаабытын ууран үлэлииргэ кыһаллабыт”, — диэн сэбиэдиссэй Марина Верховская үөрүүтүн үллэстэр.