Ахсынньы 3-12 күннэригэр Саккырыырдааҕы “Хаарчаана” оҕо уһуйаана тэриллибитэ 90 сылын бэлиэтиир үбүлүөйдээх кэрэ-бэлиэ тэрээһиннэр үөрүү-көтүү аргыстанан уһуйааммытыгар киэҥ далааһыннаахтык аастылар.
Ол курдук, хас биирдии бөлөххө иитээччилэр аһаҕас дьарыктары көрдөрдүлэр: саамай кырачаан 1,5 саастаах оҕолорбутугар “Күнчээн” бөлөххө Лыткина В.М. “Эһэ Миисэҕэ ыалдьыттааһын” диэн тулалыыр эйгэ дьарыгын, 2 саастаах “Тугутчаан” бөлөххө Корнилова М.Ю. “Лучики для солнца” интегрированнай дьарыгы, 3 саастаах оҕолорго “Туллукчаан” бөлөххө Никитина Е.С. “Баай Байанайга ыалдьыттааһын” интегрированнай дьарыгы, 4 саастаах оҕолорго “Нөлтэнкэ” бөлөххө Слепцова Л.Н. оонньуу нөҥүө ахсаан дьарыгын, 5 саастаах оҕолорго “Чуораанчык” бөлөххө Захарова С.С. ТРИЗ ньыманан “Веселые снеговики” дьарыгы, “Кустук” бөлөххө Пинигина С.П. оҕону кэрэни өйдүүр дьоҕурун сайыннарыыга “Сказочные, синие, красные птицы” дьарык уонна “Сулусчаан” оскуола иннинээҕи саастаах уһуйаан выпускниктарыгар Стручкова Х.И. эбии үөрэхтээһин Акробатика куруһуогун сырдатар дьарык бэрт сэргэхтик буолан аастылар.
Ону тэҥэ ахсынньы 6 күнүгэр уһуйааммыт иһинэн “С юбилеем, наш садик” диэн эҕэрдэ стендэнэн хаһыат күрэҕэ буолла. Бу күрэххэ кыайыы өрөгөйүн, 1 миэстэни саамай кырачаан “Күнчээн” бөлөх ылла. 2 миэстэни “Тугутчаан” бөлөх, 3 миэстэни “Сулусчаан” бэлэмнэнии бөлөхтөр туттулар.
Ахсынньы 9 күнүгэр “Мин тапталлаах уһуйааным” диэн оҕолорбут уруһуйдарын быыстапката тэрилиннэ.
Онтон, дьэ, ахсынньы 10-12 күннэригэр хас биирдии бөлөххө “Хаарчаана” уһуйааммыт 90 сыллаах үбүлүөйдээх бырааһынньыктарынан күндү иитээччилэрбит оҕолорго элбэх үөрүүлээх түгэннэрдээх, олус үчүгэй бырааһынньыктары ыыттылар. Бу долгутуулаах дьоро күммүтүгэр оҕолорбут ыллаан-туойан, оонньоон-көрүлээн, минньигэс кэһиилэри тутан олус үөрэн-көтөн бэлиэтээтилэр. Уһуйаан салайааччыта Верховская М.В. күндү оҕолору, бары үлэһиттэри эҕэрдэлээн туран, үөрүүлээх быһыыга-майгыга хас биирдии бөлөххө 5000 солк. сууммалаах сэртипикээттэри туттарда.
Мария Никитина, «Хаарчаана» оҕо уһуйаанын старшай иитээччитэ