Киин куораппытыгар Дьокуускайга Эбээн-Бытантай национальнай улууһа тэриллибитэ 35 сылыгар туһуламмыт тэрээһиннэр киэҥ далааһыннаахтык ыытыллаллар.
Норуоттар доҕордоһууларын дьиэтигэр аҕыйах ахсааннаах хотугу норуоттар маастардарын быыстапката арылынна. Быыстапкаҕа эбээн омук култуурунай нэһилиэстибэтин уонна баайын көрдөрөр илиинэн тигиллибит ураты оҥоһуктары туруордулар. Кэрэни кэрэхсээччилэр болҕомтолорун уонна интэриэстэрин эриэккэс дьэрэкээн билэлээх унтуулар тартылар. Сахабыт сиригэр аатырар хотугу унтуулары тутан-хабан көрөөрү үгүс дьон тоҕуоруста.
Маны тэҥэ улуус тэриллибитэ 35 сылын бэлиэтээһин чэрчитинэн дьыалабыай көрсүһүүлэр буоллулар. Ол курдук, ахсынньы 11 күнүгэр улуус баһылыга Иннокентий Стручков, нэһилиэктэр баһылыктара Сергей Аликов, Роберт Колесов, Лев Горохов, И.Н.Слепцов аатынан оскуола дириэктэрэ Матрена Горохова, экэниэмикэ салаатын салайааччыта Диана Сыроватская уонна улуус дьокутаата Иннокентий Аммосов Саха Өрөспүүбүлүкэтин үпкэ министиир солбуйааччыта Николай Старостинныын, Саха Өрөспүүбүлүкэтин экэниэмикэҕэ министиир Петр Поповы кытта көрсүһүүгэ улуус социальнай- экэнэмиичэскэй сайдыытын кэпсэттилэр. 
Ахсынньы 12 күнүгэр улуус дэлэгээссийэтэ СӨ Ил Түмэнин Судаарыстыбаннай мунньаҕар сырытта. Улуус социальнай-экэнэмиичэскэй сайдыытыгар дьоһун кылааттарын киллэрбит дьоммутугар Ил Түмэн Сис Кэмитиэттэрин Бочуот грамоталарын тэҥэ махтал суруктар туттарылыннылар.
Ахсынньы 13 күнүгэр Эстрада судаарыстыбаннай тыйаатырыгар анал байыаннай дьайыы кыттыылаахтара, хорсун санаалаах доҕордуу уолаттарбыт Иван Горохов уонна Герман Ефимов тиһэх ырыаларын сүрэхтэниитигэр аналлаах аһымал кэнсиэр ыытыллыаҕа. Кэнсиэргэ киирбит үп анал дьайыыга сылдьар буойуннарбытыгар көмөҕө барыаҕа.
Улууспут күннэрин үөрүүлээх түмүктэниитэ Ю.А. Гагарин аатынан култуура киинигэр ахсынньы 14 күнүгэр буолуоҕа.