Дьокуускай куоракка Эбээн-Бытантай улууһа тэриллибитэ 35 сылыгар анаммыт тэрээһиннэр түмүктэннилэр. Биир дойдулаахтары түмэр көрсүһүүлэргэ урукку сылларга биһиги улууспутугар олорбут, үлэлээбит дьон мустаннар, биһиги улууспут, дьоммут-сэргэбит туһунан олус истиҥ-иһирэх тылларынан ахтан-санаан аастылар. Олор истэригэр Пелагея Иннокентьевна уонна Иннокентий Егорович Дормидонтовтар дьиэ кэргэттэрэ.
Быйыл дойдубутугар биллэриллибит Дьиэ кэргэн сыла түмүктэнэн эрэринэн, Эбээн-Бытантай улууһугар ньир бааччы ыал буолан уон сыл устата үлэлээн-хамсаан олорбут Дормидонтовтар дьиэ кэргэттэрэ Саккырыыр элбэх оҕолоох уопсастыбанньык эдэр ыалыгар Айсана Зияйдиновна, Александр Дмитриевич Аммосовтарга 20 тыһ. солк. сууммалаах сертификаты үөрүүлээх быһыыга-майгыга туттарбыттара.
“Үтүө күнүнэн, сайдам санаалаах хоту дойдум хоһуун дьоно! 40 сыл анараа өттүгэр хоту дойду кыыһынаан харахпытынан хайҕаһан, сүрэхпитинэн сөбүлэһэн ыал буолбуппут, ол сылыгар уол оҕоломмуппут.
1986 сыллаахха Саккырыырга көһөн тиийэн олохсуйбуппут, кыыс оҕону төрөтөн ньир бааччы ыал буолан уон сыл олорбуппут. Дойду киһитигэр барыта ураты этэ, ол эрэн олус сөбүлээн, араас дьоннуун алтыһан, боростуой учууталтан дириэктэргэ тиийэ үлэлээн, улуус депутата буолан саҥа сайдан эрэр Эбээн-Бытантай улууһа сайдыытыгар бэйэм кылааппын киллэрсибиппинэн киэн туттабын.
Ханнык да үлэҕэ олус элбэх үтүө үлэһит дьону кытта алтыһан элбэххэ үөрэнэн, табаарыстаһан кэллэҕим. Элбэхтэн аҕыйаҕы ааттыам: Елена Николаевна Крылова, Анна Тимофеевна Стручкова, Егор Колесов — Бытантай, Степан Дмитриевич Соловьев, Руслан Николаевич Аммосов, Гаврил Ильич Горохов, Василий Шадрин (биһиги Манчаары диир этибит). Ити курдук ааттаан бара туруохха сөп.
Саккырыырга тиийэн элбэх оҕолоох Елена Егоровна, Иннокентий Егорович дьиэ кэргэнигэр тапталлаах мааны күтүөт буола түспүтүм. Олус диэн эйэлээх, үлэни өрө туппут, булду-алды да сөбүгэр бултуур ыалларга элбэххэ үөрэммитим, ийэ-аҕа оҥостубутум. Хайалара да уопсастыбаннай үлэттэн туора турбатах дьон саахыматтыылларын, артыыстыылларын, гитараҕа, балалайкаҕа оонньуулларын сөбүлүүллэрэ.
Быйыл Дьиэ кэргэн сыла түмүктэнэн эрэринэн түбэһиннэрэн үөрэн-көтөн туран, дьоммутун Елена Егоровнаны, Иннокентий Егоровиһы санаан, кэриэстээн Саккырыыр элбэх оҕолоох уопсастыбанньык эдэр ыалыгар Дормидонтовтар дьиэ кэргэттэрин аатыттан сертификат туттардыбыт»,- диэн Иннокентий Егорович кэпсээтэ.
Сардаана Копырина