Биһиги биир дойдулаахпыт Альберт Слепцов урбаан эйгэтигэр эриллэн-мускуллан үлэлээбитэ быйыл 13 сыла. Кини уустук суоллаах-иистээх хоту дойдуга урбаан биир ыарахан көрүҥүнэн — таһаҕас тиэйиинэн дьарыктанар. Былдьаһыктаах кыһыҥҥы суолу тутуһа, үгүс суоппардар курдук уруулун туппутунан утуйар ууну умнан туран, хайалар быыстарынан айаннатан, ылбычча киһи үлэлээбэт бэрт эппиэтинэстээх соругун толорор. Хоту сиргэ олорор дьон бары да өйдүүбүт, тыйыс усулуобуйалаах дойдубутугар ас-үөл, таҥас-сап, наадалаах табаар кэлиитэ, быһатын олохпут хаамыыта, уйгута – Альберт курдук суоппардар түбүктээх үлэлэриттэн тахсар.
“Урбаанньыт идэтигэр 2012 сылтан киирбитим. Бастаан саҕалыырбар нэһилиэнньэҕэ оттук мас тиэйбитим, 7 сыл үлэлээбитим. Онтон кэнники куораттан таһаҕас тиэйиитинэн дьарыгырбытым, атыыһыттарга, нэһилиэнньэҕэ таһаҕас тиэйэбин. Сылга 4-8 эриэйсэ курдук тахсар, таһаҕас хайдах көстөрүттэн,” – диэн эдэр урбаанньыт Альберт Анатольевич кэпсиир.
Нэһилиэнньэҕэ иһэр ууну тиэйии боппуруоһа сорох ардыгар сытыытык турар. Чааһынай дьон ылсан үлэлииллэрэ хайҕабыллаах, ол эрэн, чааһынай киһи хайдах үлэлиирин бэйэтэ билэр, эбиитин кэтэх хаһаайыстыбалаах буол. Билигин сайыҥҥы кэмҥэ Альберт бу үлэни ылсан, Түгэһиир нэһилиэгин дьаһалтатын кытары дуогабардаһан, дьону-сэргэни уунан хааччыйар.
Альберт тапталлаах кэргэнэ, олоҕун эрэллээх аргыһа Юлиана Семеновна уҥа илиитэ, саамай тутаах киһитэ. Эдэр ыаллар үлэ үөһүттэн соло булан, бириэмэлэрин сатабыллаахтык аттаран, нэһилиэккэ, улууска ыытыллар тэрээһиннэргэ, спортивнай күрэхтэргэ дьиэ кэргэнинэн көхтөөхтүк кытталлар, чөл, чэбдик олоҕу, үлэни-хамнаһы өрө туталлар. Оҕолорун эмиэ уопсастыбаннай олоххо актыыбынай буоларга бэйэлэрин холобурдарынан иитэллэр.
«Дьиэ кэргэним туһунан кэпсээтэххэ, кэргэннээхпин, 3 уол оҕолоохпун — Саккырыыр орто оскуолатын 2, 4, 9 кылаастары бүтэрдилэр. Араас тэрээһиннэргэ быыс булан кытта сатыыбыт. Уолаттарбын спорт эйгэтигэр дьарыктыыбын.
Бүгүҥҥү урбаанньыт күнүнэн улууспутун араас өҥөнөн хааччыйан олорор урбаанньыттары ис сүрэхпиттэн истиҥник эҕэрдэлиибин, санаабыккыт барыта сатанан истин, туохтан да толлубакка иннигит диэки баран иһиҥ!”
Бүгүн, ыам ыйын 26 күнэ — Арассыыйаҕа урбаан күнэ. Бу бэлиэ күнүнэн Түгэһиир нэһилиэгин дьаһалтатын уонна нэһилиэк Сэбиэтин дьокутааттарын аатыттан нэһилиэк баһылыга Сергей Аликов бары урбаанньыттары итиитик-истиҥник эҕэрдэлээн туран, Альберт Анатольевичка барҕа махталын биллэрэр.
«Ытыктабыллаах бары көрүҥ урбаанньыттара!
Бүгүн эһигини “Түгэһиир нэһилиэгэ” олохтоох дьаһалта уонна нэһилиэк Сэбиэтин дьокутааттарын аатыттан Арассыыйаҕа урбаан күнүнэн итиитик-истиҥник эҕэрдэлиибин!
Эһиги биһиги тыйыс усулуобуйабытын аахсыбакка, күүстээх дьаныардаах үлэнэн, сыранан үлэ үөһүгэр сылдьан, бар дьон ытыктабылын, махталын ылыаххытын ылаҕыт.
Урбаан бары эйгэтэ киэҥ хабааннаах үлэлээх. Эһиги биһиги нэһилиэкпитигэр үлэ миэстэтин арыйан тустаах үлэни ыытаргыт барыбытын үөрдэр. Тыа хаһаайыстыбата, мас тиэйии өҥөтө, атыы-эргиэн уонна атын эйгэҕэ сүҥкэн кылааккытын киллэрэҕит, олохтоох дьон олоҕун тупсараҕыт.
Бу билигин дойдубутугар анал байыаннай дьайыы буола турар кэмигэр быйыл бүтүн нэһилиэгинэн аһымал аахсыйаҕа кыттан, биир дойдулаахтарбытыгар, хорсун-хоодуот байыастарбытыгар ас-таҥас хомуйан ыытарбытыгар күүс-көмө буолан, буор босхо 473 киилэ таһаҕаһы бэйэтин массыынатынан куоракка диэри туох да саахала суох бүүс-бүтүннүү тиэйэн биэрбит урбаанньыт Слепцов Альберт Анатольевиһы бэлиэтээн махтал тылларын этиэхпин баҕарабын. Бу барыта 31 дьааһык тоҥ аһы, онно эбии 201 киилэ (26 миэстэ) Кустуур нэһилиэгин олохтоохторо хомуйан ыыппыт таһаҕастарын барытын бүөбэйдээн, кичэллээхтик харайан тиэрдибитэ. Альберт Анатольевич олохтоох дьаһалта көҕүлээһининэн билигин туох да тардыллыыта суох олохтоохтору, тэрилтэлэри иһэр уунан хааччыйа олороро үөрдэр. Үлэҕэ көхтөөх эдэр киһиэхэ Альберт Анатольевичка Түгэһиир нэһилиэгин дьаһалтатын аатыттан дириҥник махтанабын.
Күндү доҕоттор!
Бу үөрүүлээх күҥҥэ барыгытыгар үлэҕитигэр ситиһиини, тус бэйэҕитигэр уонна тулалыыр дьоҥҥутугар кытаанах доруобуйаны, дьиэ кэргэҥҥитигэр дьолу-саргыны баҕарабын! Эһиги аныгы олох дьоруойдара буолаҕыт!” – диэн Сергей Сергеевич урбаанньыттарга идэлээх күннэринэн итии-истиҥник эҕэрдэ, махтал тылларын тириэртэ.