Долгуйан күүтэр сайыҥҥы уоппускабыт кэмэ чугаһаата. Сонотуоруйга ким уонна ханнык усулуобуйаҕа босхо путевканы ылыан сөбүн туһунан «Объясняем.рф» портал быһаарар.
Федеральнай чэпчэтиилэринэн туһанааччылар
Босхо путевканан уонна эмтэнэр сиригэр диэри айанынан хааччыллар Арассыыйа олохтоохторун испииһэгэ судаарыстыбаннай социальнай көмө туһунан сокуоҥҥа бигэргэтиллибитэ. Манна киирэллэр:
— инбэлииттэр (ол иһигэр оҕолор);
— Аҕа дойду Улуу сэриитин кыттыылаахтара уонна сэрии инбэлииттэрэ;
— байыаннай дьайыылар бэтэрээннэрэ – байыаннай дьайыы зонатыгар, Сирияҕа, Афганистаҥҥа байыаннай дьайыыларга кыттыбыт байыаннайдар уонна да атын дьон;
— Блокадалаах Ленинград олохтоохторо;
— сэрии сылларыгар оборуона эбийиэктэригэр үлэлээбит Арассыыйа олохтоохторо;
— өлбүт сэрии инбэлииттэрин уонна бэтэрээннэрин дьиэ кэргэттэрэ;
— Чернобыль саахалын содулун туоратыспыттар эбэтэр Семипалатинскай полигоҥҥа ядернай тургутуулартан эмсэҕэлээбиттэр.
Эрэгийиэннээҕи чэпчэтиилэринэн туһанааччылар
Өскөтүн киһи федеральнай испииһэккэ киирбэт буоллаҕына, кини эрэгийиэннээҕи бырагыраамаларынан путевка ыларга туруорсуон сөп. Маны туһаныахтарын сөп:
— үлэ уонна байыаннай сулууспа бэтэрээннэрэ;
— тыыл үлэһиттэрэ;
— 1927 сыл балаҕан ыйын 4 күнүттэн 1945 сыл балаҕан ыйын 3 күнүгэр диэри төрөөбүт “сэрии оҕолоро”;
— үлэлээбэт биэнсийэлээхтэр;
— бочуоттаах донордар;
— биэнсийэҕэ тахсыахтаах саастаахтар;
— ыксаллаах быһыы-майгы уонна теракт түмүгэр эмсэҕэлээбиттэр.
Чопчу испииһэк олорор эрэгийиэниттэн тутулуктаах. Бу туһунан сиһилии олохтоох социальнай көмүскэл эбэтэр үлэ министиэристибэтин саайтыгар, МФЦ-га, Социальнай пуондатҕа эбэтэр Госуслуги порталга билсиэххэ сөп.
Оборуона министиэристибэтин биэнсийэлээхтэрэ
Оборуона министиэристибэтин, ИДьМ, Росгвардия, ФСБ биэнсийэлээхтэрэ 20-тэн тахса сыл сулууспалаабыт буоллахтарына, биэдэмистибэ сонотуоруйдарыгар чэпчэтиилээх усулуобуйанан путевканы ылаллар:
— путевка сыанатыттан 25 эбэтэр 50% төлүүллэр, ордугун биэдэмистибэ уйунар;
— эмтэнэргэ анал мэдэссиинэ көрдөрүүтэ баар буоллаҕына, эмтэнии толору судаарыстыба бүддьүөтүттэн буолуон сөп.
Путевканы хайдах оҥотторобутуй?
Манна сайабылыанньа, олорор сиргинэн эмтиир быраастан № 070/у формалаах ыспыраапка, пааспар эбэтэр киһини бигэргэтэр атын докумуон ирдэнэр. Докумуоннары Социальнай пуондаҕа бэйэҥ тиийэн, буостанан, МФЦ эбэтэр Госуслуги нөҥүө туттарыахха сөп.
Болдьоҕо:
— уочаракка туруу — 10 хонукка диэри;
— путевканы оҥоруу — сонотуоруйга киириэх иннинэ 18–21 хонук хааллаҕына.
Болҕойуҥ! Путевканы уочарат бэрээдэгинэн уонна эмтэнэргэ мэдиссиинэ көрдөрүүтэ баар буоллаҕына эрэ биэрэллэр.
@ cахаcирэ