Ахсынньы 22 күнэ саамай кылгас, бүтэй кэм. Сулустар сипсиһэр дьыл кэмигэр дьиэҕэ-уокка сырдыгы биэрэр идэлээх дьоммут – Энергетиктар идэлээх күннэрин бэлиэтииллэр. Сырдык баарын тухары-олох баар.
Киһи – аймах олоҕо уйгулаах буоларыгар сүрүн суолталаах, сабыдыаллаах эйгэ улууска чэчирии сайдарыгар тиһиктээх үлэ ыытыллар. Кэккэ сылларга үгүс өрөмүөн үлэтин тэҥэ саҥа кирбиилэри олоххо киллэрэн, тэрил саппааһын хаҥатыы, саҥардыы үлэтэ ыытылынна. Бүгүҥҥү күҥҥэ уот ситимигэр барыта 54 исписэлиис күннэри-түүннэри үлэлиир-хамсыыр. Ыччат дьон эмиэ хото бу эйгэҕэ ылсар, кинилэр ахсааннара 20 киһи. Үгэс быһыытынан, идэлээх күннэринэн эҕэрдэлээн, уот ситимин өр сылларга эҥкилэ суох салайар Владимир Дмитриевтыын кэпсэттибит.
- Бастатан туран, идэлээх күммүтүнэн бука бары бэтэрээннэрбитин, уот ситимин иллээх-эйэлээх кэлэктиибин итиитик-истиҥник эҕэрдэлиибин! Эһиги үлэҕэ эппиэтинэстээх сыһыаҥҥытынан биһиги үлэбит сыаналанар, сайдыы барар. Чэгиэн туругу, тус олоххутугар өйдөһүүнү, өйөһүүнү, дьолу баҕарабын! Үс нэһилиэккэ уот ситимин орто саастаах кэллиэгэлэрбит салайаллар, ол курдук, Саккырыырга П.А.Верховский, Кустуурга Д.И.Горохов уонна Дьарҕаалаахха В.П.Петров. Кинилэр быһаччы сөптөөх салайыыларынан бу нэһилиэктэргэ уот ситимэ харгыһа суох үлэлииллэр. Сыл аайы биһиэхэ эдэрдэр үлэлии киирэллэр, бу уот ситимин эйгэтэ инникилээҕин туоһулуур. Үлэһиттэрбит бары олус эппиэтинэстээхтэр, хаачыстыба туһугар ис санааларыттан үлэлииллэр. Чуолаан бэтэрээн үлэһиттэрбитин, быйыл үбүлүөйүн бэлиэтээбит А.Х.Гороховы,А.Н.Дмитриевы, Е.Н.Слепцованы, В.П.Петрованы, М.Е.Аммосованы, А.Н.Лаптевы, В.П.Докторовы, Р.И.Сотрудниковы, И.П.Рожины, Н.С.Старостины, Р.К. Ивановы, Ю.И.Постниковы бэлиэтиэм этэ.
Үлэ-хамнас туһунан сырдаттахха, сыллата үгүс элбэх өрөмүөн, саҥа кирбиилэри киллэрии үлэтэ былааннаахтык ыытыллар. Ааһан эрэр сылга барыта 6000000 кВт.ч. уот туһанылынна, 1580 туонна уматык тиэлиннэ. Кустуурга – 0,5 км., Саккырыырга – 0,3 км. салгын лиинийэтэ СИП -ка уларытылынна. Маны тэҥэ, Саккырыырга 0,4 кВ -0,5 км. демонтажтанна. “Ферма” түөлбэҕэ 250-наах комплектнай трансформаторнай подстанция, КТП- 400 -кэ уларыйда. Кустуурга эмиэ саҥа хочуолунай үлэҕэ киирбитинэн КТП уларыйда уонна сөргүтүлүннэ. Сүрүн тэриллэрбитин өрөмүөннээһин былааннаахтык ыытыллар. Ол курдук, улуус киинигэр биир САТ дизельнай генератор хапытаалынай уонна үһэ өрөмүөннэннэ. Кустуурга саҥа дизельнай генератор ДЭС модульга таҥыллан туруорулунна. Дьарҕаалаахха утилизатор хочуоллар уларытылыннылар. Маны тэҥэ, Саккырыырга, Кустуурга эбийиэктэрбитигэр, ыскылааттарбытыгар араас хабааннаах өрөмүөн үлэтэ, күрүөлээһинэ ыытылынна. Хаадырынан хааччыллыы 100%. «Сахаэнерго» АО хаадырдары өйөөһүҥҥэ улахан болҕомтотун уурар. Ол курдук, анал таҥаһынан, айан ороскуотун төлөбүрэ, медицинскэй хамыыһыйаны ааһыы харгыһа суох оҥоһуллар. Идэҕэ угуйууга анаан биһиги үлэһиттэрбитигэр араас бырагыраамалар үлэлииллэр. Холобура, ипотека бырыһыанын толуйуута, бастакы усунуоска дьоһун өйөбүл көрүллэр, дьиэ атыылаһыытыгар, туттарга диэн бырыһыана суох араас сойуомнар бааллар. Эмтэниини ааһары, тиис оҥотторуутун «Сахаэнерго» тэрилтэтэ барытын бэйэтин суотугар оҥотторор. Сыл аайы профсоюзпут куорат сыанатынан бородууктанан уонна д.а. хааччыйар. Хаадырдары үөрэхтээһиҥҥэ болҕомто күүстээх. Онон, биһиэхэ үлэлиир нууччалыы эттэххэ, престижнай. Өссө төгүл бары кэллиэгэлэрбит Идэлээх күммүтүнэн эҕэрдэлиибин!
Сырдыгы сыдьаайар идэлээх дьоммутун – Энергетиктары ис сүрэхтэн идэтийбит күннэринэн эҕэрдэлиибит! Үлэҕит ситиһиилээх, тус олоххут сырдык буоллун!
Яна РОЖИНА