Түгэһиир нэһилиэгин олохтоохторо Арассыыйа Федерациятын биир саамай улахан субъегын – Сахабыт сирин Судаарыстыбаннаһын күнүн уруйдуу-айхаллыы бэлиэтээтилэр.
Үөрүүлээх чааска тэрээһини ыытааччы Лидия Сыроватская бырааһынньык устуоруйатын кэнчээри ыччакка билиһиннэрдэ, сырдатта.
Үрдүк суолталаах күммүтүгэр Эбээн-Бытантай улууһун баһылыгын бастакы солбуйааччыта Александра Иванова Саха Өрөспүүбүлүкэтин Судаарыстыбаннаһын күнүнэн, итиэннэ эмиэ бу күн бэлиэтэнэр Оскуола иннинээҕи тэрилтэлэр үлэһиттэрин күнүнэн кырачаан оҕолорбутун иитэр-үөрэтэр уһуйаан үлэһиттэрин улууспут аҕа баһылыгын уонна улуус дьокутааттарын аатыттан итиитик-истиҥник эҕэрдэлээтэ.
Түгэһиир нэһилиэгин баһылыга Сергей Аликов истиҥ тылларга кыттыһан бука-бары нэһилиэк олохтоохторугар эҕэрдэтин тириэртэ.
Бу күн өссө биир долгутуулаах түгэнинэн полиция пуунун начальнига Владислав Яковлевич 14 саастарын туолбут Арассыыйа эдэр гражданнарыгар үөрүүлээх быһыыга-майгыга пааспар туттарда.
Онтон «Бастакылар хамсааһыннарын” олохтоох салаата «Мы – граждане России” бырагыраама чэрчитинэн оҕолорго пааспар хаҕын кытары ыччаттар хамсааһыннарын бэлиэлэрин бэлэх уунна. 
Тэрээһиҥҥэ улууспут бибилэтиэкэтэ көхтөөх кыттыыны ылан, «Сахам сирэ – мин киэн туттуум” кинигэ быыстапкатын туруорда, итиэннэ минньигэс бириистээх тургутук викторина ыытта.
Бырааһынньык күнүн «Тугусил” народнай ансаамбыл кэрэ кыргыттара эрчимнээх үҥкүүлэринэн, кэрэ куоластаах Егор Слепцов, эдэр ийэ Татьяна Старостина ылбаҕай ырыаларынан киэргэттилэр.
Түмүктүүр чааска бары мустубут дьон-сэргэ, кэнчээри ыччаттар илии илииттэн ылсыһан оһуохайдаан эргийдилэр. 