Сыл устата ыытыллыбыт “Спортивные якутяне” үөрэнээччилэр Спартакиадаларын түмүгүн «Туймаада” стадиоҥҥа үөрүүлээх быһыыга- майгыга таһаардылар. Спартакиада бары муниципальнай оройуону уонна бары үөрэх тэрилтэтин хапта. 76 тыһыынчаттан тахса оҕо кыттыыны ылла, ол иһигэр биһиги, Эбээн-Бытантай улууһун кэнчээрилэрэ, саамай маассабай тэрээһиҥҥэ күөн көрсөн, маастарыстыбаларын таһымын үрдэттилэр.
“Биһиги оҕолорбут 29 көрүҥтэн 9 көрүҥҥэ, чуолаан бадминтоҥҥа, греко-римскэй тустууга, остуол тенниһигэр, дуобакка, саахымакка, сахалыы ыстаныыга, көҥүл тустууга, чэпчэки атлетикаҕа, мас тардыһыыга кыттан, уопсай хамаанданан түмүккэ 9 хотугу оройуонтан 5-с миэстэ буоллубут. Спартакиада финалыгар 12 эдэр спортсмен кыттыыны ылла.
Спартакиада үрдүк таһымнаахтык буолла, тыҥааһыннаах күрэхтэһиилэр аастылар. Биллэн туран, спортсмен оҕолорбут уопут бөҕө ыллылар, күүс-уох бэрэбиэркэлэннилэр. Спордунан дьарыктанар оҕолор сайдалларыгар бу улахан тэрээһин төһүү күүс буолла,” – диэн оҕо спортивнай оскуолатын дириэктэрэ Мария Афанасьева сырдатта.