Эбэни аһатыы.
Ыам ыйыгар эбэни аһатыы туома оҥоһуллар.
Эдьиий Дора сүбэлииринэн, эбэ мууһа ыраастаммытын кэннэ, ыам ыйын 22-24 күннэригэр аһатар ордук. Күөл, өрүс кытылыгар киирэн, арыылаах алаадьы ууруллар. Алаадьыны анаан буһарыллар, мантан биири да ылан сиэниллибэт.
Сарсыарда 11-чаастан күнүскү кэмҥэ диэри киирэн ууруохха сөп. Ортотугар ынах арыытын томточчу ууран баран, алаадьылары күн хаамыытынан батыһа төгүрүччү ууруллар. Тугу да саҥарыллыбат, арай, эбэ диэки хайыһан, искэр саныаххын, көрдөһүөххүн сөп. Ыт-кус, суор-тураах сииригэр кыһаллыа суохтааххын.
Дойдутугар сылдьыбатаҕа өр буолбут киһи эмиэ аан бастаан эбэтин киирэн аһатыахтаах. Алаадьынан, эбэтэр үрүҥ аһынан, сүрүннээн, суоратынан аһатыллар. Балыктыах иннинэ эмиэ бу сиэр-туом тутуһуллар. «Эбэм иччитэ, мин диэки көр, мичик гын, балыккыттан өлүүлээ» диэн баран, суораты күөлгэ, уу кытыытыгар кутуллар. Хайаан да илииҥ иһинэн кутуохтааххын.