Түгэһиир нэһилиэгэр олохтоох көҕүлээһиннэри өйүүр бырагыраама чэрчитинэн сүрдээх тупсаҕай көстүүлээх, көрбүт эрэ киһи кэрэхсиир таас оҥоһуктар — Хотугу норуоттар оонньууларын символлардаах сквер тутуллан бүттэ. Бу сквери тутууга худуоһунньуктар союзтарын чилиэнэ, СӨ култууратын туйгуна Алексей Андреев бэйэтин хамаандатын кытары үлэлээтэ.
«Мин Саккырыырга иккис кэлиим буолар. Былырыын Түгэһиир нэһилиэгин киин уулуссатыгар саха оҕуһун, сылгытын, эбээн омук таба кыылын мэҥэ таас оҥоһуктары оҥорбуппутун олохтоохтор сэргээбиттэрэ буолуо. Онтон быйыл аэропортан тахсыы аартыкка Эбээн-Бытантай диэн суруктаах, очуос таас үрдүгэр турар чубукуну туруордубут.
Маны таһынан эһиги улуускутугар хас да төгүл ыытыллыбыт өрөспүүбүлүкэ таһымнаах Хотугу норуоттар Оонньууларыгар анаан тыа хаһаайыстыбатын саамай сүрүн дьиэ кыылларын – саха сүөһүтүн, табаны уонна улуус гербэтигэр ойууланар чубуку кыылы оҥорон бүтэрдибит. Кэннин фонугар үс ураһалаах, онно эмиэ спортивнай оонньуу эмблемалара, Саха сирин, Эбээн-Бытантай гералдиката барыта баар. Киһи хараҕар быраҕыллар чаҕылхай, кыраһыабай гына кыһаллан туран үлэлээтибит,» — диэн Алексей Васильевич үлэ хаамыытын туһунан билиһиннэрдэ.
Улууспут киинигэр чахчы даҕаны кыраһыабай успуорт скверэ тутулунна. Сылтан сыл аайы улууспут, нэһилиэктэр дьаһалталара «Олохтоох көҕүлээһиннэри өйүүр” бырагыраамаларга кыттан, өрөспүүбүлүкэ бүддьүөтүттэн үбүлээһини ситиһэн, киин сиртэн ырааҕынан тайаан сытар хотугу дойдубут нэһилиэктэрэ киэркэйэн иһэллэрэ үөрдэр.
Биллэн туран, ханна үлэ ыытыллар, онно үгүс ыйытык үөскүүр. Бу күннэргэ нэһилиэнньэ өттүттэн социальнай ситимнэргэ таас оҥоһуктар атахтара тоҕо кылгаһый, тоҕо бэйэлэрэ кыраларый диэн дьон-сэргэ интэриэһиргээн үгүс ыйытык киирбитэ. Ону Алексей Васильевич быһааран биэрдэ: «Оҕо спортивнай оонньууларыгар ханна баҕарар мультяшнай, стилизованнай оҥоһуктар, фигуралар буолаллар. Ити Олимпийскай мишка, Азия оҕолорун Оонньууларыгар мамонтенок буоллун, оннук символлар оҥоһуллаллар. Хайдах баарынан быһыылаах-таһаалаах оҥоһуктар – эбээн омук табата, саха сылгыта, оҕуһа, чубуку кыыл нэһилиэк киин уулуссаларыгар тураллар».
Сахалыы мындыр толкуйдаах, илиитигэр сатабыллаах туттуулаах Алексей Васильевич салайыытынан биһиги улууспутуттан биир дойдулаахпыт Мир Слепцов, Дьарҕаалаах оскуолатын учуутала, күтүөт Николай Слепцов уонна сварщик уол Егор Петров үлэлээтилэр. Алексей Васильевич бииргэ үлэлиир дьонун туһунан олус истиҥник-иһирэхтик кэпсиир: «Сварщик уолум Егор Петров диэн, үлэтин бэрткэ сатыыр эдэр киһи. Табаарыспыт, эһиги биир дойдулааххыт Мир Слепцов Нам улууһун педучилищетын бүтэрбитэ, эмиэ чертежник, худуоһунньук идэлээх, айылҕаттан талаан да баар, үөрэх да баар. Саамай биир тутаах киһибит буолар. Дьааҥы улууһун Сартаҥ нэһилиэгиттэн төрүттээх Николай Слепцов эмиэ маннык үлэҕэ сыстаҕас, тупсаҕай туттуулаах, кэнэҕэски өттүгэр уопут, билии-көрүү ылан, бэйэтэ даҕаны маннык үлэҕэ ылсан, үлэлиэн сөп».
Дьарҕаалаах оскуолатын физика уонна информатика учуутала Николай Слепцов сүрдээх үчүгэй бырайыакка кыттан, саҥаны биллим-көрдүм, элбэххэ үөрэнним диир.
«Бетон да, мас да, тимир да үлэтэ, барыта баар. Алексей Васильевич сүрдээх үчүгэй туттуулаах-хаптыылаах, чахчы үлэтин баһылаабыт дэгиттэр талааннаах киһи салайыытынан үлэлээбиппиттэн астынабын, үөрэбин. Эбээн-Бытантайга успуорт скверэ оҕо аймах сөбүлээн сылдьар сирэ буолуо диэн бүк эрэллээхпин”, — диэн санаатын үллэһиннэ.
Сардаана Копырина
Хаартыскаҕа түһэрдэ Ньургун Боярский