Түгэһиир нэһилиэгэр паназиатскай куукунанан дьарыгырар, бары сөбүлээн сакаастыыр, минньигэс астаах «NarutoFood “ тэриллибитэ 10 сылын сэмэйдик бэлиэтээтэ. Үбүлүөйдээх түгэнинэн сөбүлүүр дьарыгын таба тайаммыт, дьоҕус бизнеһын сатабыллаахтык салайар асчыт кыыстыын, эдэр ийэлиин Кристина Владимированы кытары кэпсэттибит.
— Эбээн-Бытантай улууһугар кийиит буолан кэлэн, бэйэҥ дьоҕус бизнес тэринэн, дьон сакааһынан паназиатскай астары атыылаабытын номнуо 10 сыл буола оҕуста. Аан маҥнай суши, роллы диэн биһиэхэ, хоту дойду олохтоохторугар, сонун астары астаан атыылаан саҕалаабыт эбит буоллаххына, кэлиҥҥи кэмҥэ менюгар ас арааһа киирэн, билигин туох сонун ас баарый?
— Бастаан үлэлээн саҕалыырбар суши эрэ оҥорор этим, олус боростуойдук, аҕыйах арааһын оҥорорум. Билигин суши, роллы ураты араас бурдук ас, сүрүн бүлүүдэлэр, салааттар, кондитерскай оҥоһуктар, оннооҕор утахтар бааллар. Куукунам паназиатскай, ол аата араас Азия дойдуларын бүлүүдэлэрэ барыта киирэр: Кытай, Корея, Япония. Олохтоох бородууксуйаны эбэн, холобур, выпечкаларга, пельменнэргэ сымыыты, бургердар кэтилиэттэригэр, гедзеҕа таба этин мантан ылынан туттабын. Онон, астыыр аспар бэйэбит төрүт бородууксуйабыт киирэн, олохтоохтор хамаҕатык атыылаһаллар.
— Ас сакаастыыр дьон төһө элбэхтэрий? Кинилэри кытары социальнай ситимнэр нөҥүө сибээскит тутарыҥ, баҕа санааларын этэллэрэ буолуо.
— Сыл аайы ас сакаастыыр дьонум элбээн иһэллэр. Бастайааннай клиеннар, биллэн туран, бааллар. Балыыһа, оскуола курдук улахан тэрилтэлэр уо.д.а. сүрүннээн сакаастыыллар. Дьон-сэргэ бэйэлэрин санааларын, махтал тылларын суруйан ыыталларыттан олус үөрэбин, кинилэр үтүө баҕа санаалара өссө да үүнэ-сайда турарга миигин кынаттыыр.
— Сарсыарда эрдэттэн киэһэ хойукка дылы күнү быһа куукунаҕа түбүгүрэн, оҕоҕо-урууга, иллэҥ кэмҥэ, сынньалаҥҥа бириэмэни хайдах булан аттараҕыный?
— Нууччалыы эттэххэ, “как белка в колесе” мөхсүнэн, турбо эрэһиимҥэ олорбутум хас да сыл буолла, оннук олоробут. Кэргэним илии-атах буолан көмөлөһөн, барыта бириэмэтигэр оҥоһуллар курдук, сороҕор сылайыы да баар буолар. “Умайан хаалыы», биллэн туран, баара, ол эрэн үлэбин сөбүлүүбүн, икки күн үлэлээбэккэ сырыттахпына туох эрэ тиийбэт курдук буолар.
— Бэйэҕэр уоппуска оҥостон, дьиэ кэргэҥҥинээн тас дойдуларга сылдьан, ол онно араас омуктар төрүт бүлүүдэлэрин амсайан, саҥаттан саҥаны бэйэҥ менюгар киллэрэн иһэрин кэрэхсэбиллээх. Саамай үтүө өйдөбүллэри хаалларбыт сынньалаҥын туһунан баһаалыста кэпсээ.
— Уоппускабытыгар сылга биирдэ сайын аайы дьиэ кэргэмминээн баран кэлэбит. Бу сайын Кытайга баран кэлтибит. Онно иэйии, муза ылынаммын дьиэм-уотум куукунатын кытай норуотун истииллээх гынан өрөмүөннээбиппит. Маннык эйгэҕэ киһи эрэ астына-астына үлэлиир. Табыгастаах, уурбут-туппут курдук, үчүгэй көстүүлээх куукунаҕа үлэлиир икки төгүл бэртээхэй! Онтон ас өттүгэр эккэ, пельмеҥҥэ уо.д.а. аһылыктарга сөптөөх элбэх араас туманы хомунан кэлэбин. Ону сыл устата туттабын. Бу сайын менюбар «рамен” диэн саҥа бүлүүдэни киллэрдим. Кытайтан араас бульон, от ыламмын туһанабын.
— Ас астыыр идэҕин төһө сөпкө таба тайаннын дии саныыгыный? Оҕо сылдьан, улаатан да баран туох үлэһит буолуоххун баҕарар этигиний?
— Кондитер үөрэҕим суох, “техник строитель аэродрома” диэн идэлээхпин. Авиационнай училищены бүтэрбитим, бэйэбэр диэн 3 сыл парикмахерга үөрэммитим. Онтон асчыт өттүгэр бизнес-оскуолаҕа 10 күннээх маастар-кылааска сылдьыбытым, “кондитер” диэн свидетельство ылбытым.
Оҕо сылдьан полиция буолуохпун баҕарар этим. Ону тоҕо эрэ авиационнай курсант буолбутум, милииссэйэ оскуолатыгар туттарсарга хойутаан хаалбытым, онтон кэтэхтэн киириэм дии санаабытым. Онтон олох да асчыт идэтигэр көстөҕүм дии. Дьокуускай куоракка устудьуоннуу сылдьан «Каре» диэн эрэстэрээҥҥэ кондитерынан үлэлээбитим. Ол миэхэ улахан уопут биэрбитэ. Сырьену хайдах курдук туттарга, сөпкө харайарга үөрэммитим.
— NarutoFood бэйэҥ дьоҕус тэрилтэҥ 10 сыллаах үбүлүөйүн хайдах бэлиэтээтигит?
— Улахан туох да бырааһынньык тэрийбэтибит. Дьүөгэлэрбин ыҥыран чэйдэппитим, атыылаһааччыларга чэпчэтиини оҥорон сакаастары ылбытым. Манна кэпсэтэр, билсэр дьонум олох аҕыйах, куруук бэйэм бэйэбэр сылдьарга үөрэммит буолан тулалыыр дьонум аҕыйахтар. Биир бэйэм курдук асчыт дьүөгэлээхпин, эмиэ сушинан дьарыгырар, бэйэ-бэйэбитин өйүүбүт, бэрсиһэбит.
— Дьон-сэргэ олус интэриэһиргиир ыйытыгын биэриэм дии. Дьиэҕитигэр мэлдьи паназиатскай куукунанан аһылыктанаҕыт эбэтэр сахалыы миин, торуой курдук төрүт астары аһыыгыт дуо?
— Ээ хантан, боростуой ас аһыыбыт. Бары дьон курдук соркуойу, миини, өрөбүл күннэргэ араас сонун ас астанабыт.
— Бэйэҥ курдук тугунан эмит дьарыгыран эбии дохуоттаныан баҕарар эдэр ийэлэргэ тугу сүбэлиэҥ этэй?
— Саамай кылаабынайа – баҕа санаа. Ас астыырын сөбүлүүр, ас астыыртан сынньанар буоллаххына, барыта чэпчэки буолар. Ас эрэ буолбакка араас салааҕа итинник. Кылаабынайа үлэҥ – сөбүлүүр дьарыгын буолуохтаах.
— Кэпсэтииҥ иһин махтанабыт. Сөбүлүүр дьарыккын толору баһылаан, ол онтон дохуоттанан, үүнэн-сайдан, дьон-сэргэ билиниитин ылан, өссө да ситиһиилээхтик үлэлээ, ай-тут!
Сардаана Копырина