Сэрии иннинээҕи кэмнэргэ, кылгас да буоллар, дьоллоох оҕо сааһы билбиппит. Аҕабытын суруйар, үөрэхтээх киһи быһыытынан, маҥнай райком инструкторынан, онтон иккис сэкирэтээринэн анааннар, оройуон киинигэр Майаҕа көһөн киирбиппит. Оччолорго тыа сиригэр драматическай тыйаатыр аан маҥнай Майаҕа тэриллибитэ, ийэбит онно иистэнньэҥ буолан артыыстар таҥастарын тигэрэ. Ол саҕанааҕы саха артыыстара — улуу олонхоһут Үстүүн Нохсоороп, ымыылаах ырыаһыт Екатерина Захарова, драма артыыстара Петр Решетников, Ариян Слепцов, Ирина Максимова, Марк уонна Матрена Слепцовтар уо.д.а. — миэхэ олус ыраас, сырдык, үрдүк өйдөбүлү хааллараннар инники дьылҕабар, идэбин буларбар сүҥкэн оруолу оонньообуттара.
1957 с. Дьокуускайдааҕы культпросвет училищены бүтэрээт, уруккута Саккырыыр оройуонугар ананан барбытым. 1958—1964 сылларга Кустуур бөһүөлэгин култууратын дьиэтигэр сэбиэдиссэйдиир кэммэр оройуоҥҥа бастыҥ үлэлээхтэр кэккэлэригэр киирбиппит. Ыраах, кытыы, суол-иис суох сиригэр ону ситиһэр манан дьыала буолбатах этэ. Оройуон кииниттэн 15 көс тэйиччи сытар нэһилиэк быыкаайык кулуубугар материальнай баайа диэн — 1 алдьаммыт байаан, 2 ыскамыайа оҕото, 1 сатыын эр киһи ырбаахыта уонна 1 Ленин мэтириэтэ. Ленин уордьаннаах холкуос кулуубун баайа онон бүппүтэ! Кулуупка биир эрэ ыстаат көрүллэр буолан, соҕотох сэбиэдиссэйбин. Маҥнай утаа олохтоох ыччат кулуупка отой сыстыбатах кэриҥнээҕэ. Кыттааччы да дьоно биир-икки киһинэн муҥурданар эбит этэ, ону да оройуоҥҥа бэрэстэбиитэл курдук тахсарга. Онон бастакынан ыччаты талааннаахтарын көрөн уһуйуу көҕүлээһин үлэтин саҕалаабытым. Кулуубум үлэтигэр олохтоохтортон эдьиийдии-балыстыы Мотрена, Мария, Вера Никитиналар күүс-көмө буолбуттара. Ону тэҥэ саҥа анаммыт парткоммут Петр Никатонович Гоголев (Уус Алдан), олохтоох сэбиэт, холкуос бэрэссэдээтэллэрэ Николай Никифоров, Степан Филиппович Борисов уопсай мунньах тэрийэн улаханнык өйөөбүттэрэ. Ити курдук тус хоту ыраах дойдуга идэбинэн үлэбин саҕалаабытым.
Сотору кэминэн комсомольскай путевканан Саха сирин киин оройуоннарыттан ыччат, ону тэҥэ Союз араас куораттарыттан фельдшер, учуутал идэлээх нуучча кыргыттара кэлитэлээн барбыттара. Онтон үгүстэрэ олохтоох ыччаттардыын ыал буолбуттара. Бэйэм олохтоох тракторист уолга, Старостин Дмитрий Петровичка, кэргэн тахсан ыал буолбуппут. Оччотооҕу 1960-с сылларга Советскай Союз космоһы баһылаан өрөгөйдөөн турар кэмэ этэ. Комсомол, партия ыччатын олоҕо күөстүү оргуйан барбыта.
1963 с. культпросвет училищетын библиотечнай салаатын кэтэхтэн бүтэрэн, 1964 с. оройуон библиотекатын сэбиэдиссэйинэн ананан, Саккырыырга көспүппүт.
Онтон 1974 сылтан бочуоттаах сынньалаҥҥа тахсыахпар диэри Саккырыыр норуодунай тыйаатырын сэбиэдиссэйинэн уонна култуура дьиэтин дириэктэринэн үлэлээбитим. Кэлин бочуоттаах сынньалаҥҥа тахсан да баран, барыта 32 сыл сыанаттан түспэккэ тыйаатырбар артыыстаабытым. Маны таһынан нэһилиэк, оройуон сэбиэттэрин депутатынан хаста да талыллан үлэлээбитим.
Раиса Ивановна Шарина, СӨ култууратын туйгуна, үлэ, тыыл бэтэрээнэ, Эбээн-Бытантай улууһун бочуоттаах олохтооҕо
Дьокуускай, 2015 с.
(Ахтыы Клара Алексеевна Горохова «Аллараа Бытантай нэһилиэгэ» кинигэтиттэн киирдэ)