Эбээн-Бытантай национальнай улууһун дьаһалтатын уонна тус бэйэм ааппыттан Эһигини барыгытын Аҕа дойдуну көмүскээччилэр күннэринэн итиитик-истиҥник эҕэрдэлиибин!
Бүгүн биһиги дойдубутугар ураты суолталаах бырааһынньык. Модун санааны, хорсун быһыыны, дойдуга бэриниилээх буолууну кэрэһэлиир. Бу күн биһиги бары дойдубутун дьоруойдуу көмүскээччилэргэ барҕа махталбытын, ытыктабылбытын, киэн туттуубутун биллэрэбит. Барыбыт олохпут, инникибит туһугар олохторун толук уурбут хорсун буойуннарбыт сырдык кэриэстэригэр сүгүрүйэбит.
2022 сылтан Украинаҕа буола турар анал байыаннай дьайыыга биһиги улууспутуттан 70-ча эр дьон кыттыыны ылла. Өрөспүүбүлүкэбитигэр саамай эдэр уонна аҕыйах ахсааннаах улууспутуттан элбэх эр хоһуун дьоммут эйэлээх олох уонна куттал суох буолуутун иһин туруммута биһиги дьоммут дойдуга бэриниилэрэ, тапталлара сүдү күүстээҕин көрдөрөр. Эһиги баар буолаҥҥыт эйэлээх олоххо олоробут, айар-тутар кыахтаахпыт, сыллата олоҕу хамсатар бырайыактары үлэҕэ киллэрэбит.
Онтон биһиги, улуус уонна нэһилиэктэр дьаһалталара, туһааннаах тэрилтэлэр, улууспут үтүө санаалаах бар дьоно бэйэбит өттүбүтүттэн эр санаалаах байыаннай дьайыы кыттыылаахтарын уонна кинилэр дьиэ кэргэттэрин туох кыалларынан өйүүбүт. 2024 сылга байыаннай дьайыы кыттыылаахтарыгар 6 683 045 солк. харчынан көмө оҥоһуллубута. 2025 сыл саҕаланыытыгар уопсайа 4,5 мөл. солк. буолла. Маны таһынан биир ситимнээх үлэнэн гуманитарнай көмө оҥоһуллуута ыытыллар.
Күндү биир дойдулаахтарым!
Барыгытыгар чэгиэн-чэбдик буолууну, олоххутугар ситиһиилэри, иллээх дьиэ кэргэни, эйэлээх халлааны баҕарабын.
Иннокентий Стручков, Эбээн-Бытантай улууһун баһылыга