Дьарҕаалаах орто оскуолатыгар Аҕа дойдуну көмүскээччи күнүгэр анаммыт суолталаах тэрээһин буолла.
Тэрээһини физкультура учуутала П.Р. Самойлова иилээн-саҕалаан арыйда. Кини Аҕа дойду Улуу сэриитин ыар сылларыгар аҕа көлүөнэ дьоммут хорсун быһыыларын ахтан-санаан, кинилэр албан ааттарын кэриэстиирбитин бэлиэтээтэ.
Оскуола дириэктэрэ С.М. Иванов билигин байыаннай дьайыыга сылдьар биһиги оскуолабытын бүтэрбит 9 уолаттарбыт кыайыы көтөллөөх дойдуларыгар эргиллэн кэлэллэригэр эрэнэ күүтэрбитин эттэ.
Маны таһынан, байыаннай дьайыы кыттыылаахтарын дьиэ кэргэттэрин ааттарыттан А.Д. Иванов өрүү өйөбүл буолар дьонноругар, С.М. Иванов уонна С.Х. Васильев махтал бэлэхтэрин туттарда.
Бу тэрээһиҥҥэ спортивнай саалабытыгар оҕолор икки ардыларыгар устуруойунан хаамыы уонна ырыа көрүү-күрэҕэ ыытылынна. Күрэххэ бастакы миэстэни – 5-7 кылаастар (командир – Арсений Захаров), 2 миэстэни – 8-11 кылаастар (командир — Семен Захаров), 3 миэстэни – 1-4 кылаастар (командир – Валерий Горохов) ыллылар. Бастыҥ командирынан Арсений Захаров ааттанна.
Ол кэннэ салгыы, физкультура учуутала А.С. Иванов көҕүлээһининэн, күрэс балаһыанньатын тутуһан, ох саанан ытыыга холонон, түөрт уол күрэстэстилэр. Түмүккэ: 1 миэстэ – Юра Васильев (8 кылаас), 2 — Максим Никитин (8 кылаас), 3 миэстэ – Семен Захаров (11 кылаас) буоллулар.
Ити курдук, Аҕа дойдуну көмүскээччи күнүгэр анаммыт суолталаах тэрээһин үрдүк таһымҥа ааста.
Нина Софронова- Туйгууна
Дьарҕаалаах бөһүөлэгэ