Бу күннэргэ улуус баһылыга Иннокентий Стручков салайааччылаах оробуочай бөлөх, улуус дьаһалтата 2024 сылга ыыппыт үлэтин отчуоттуур мунньахтара ыытыллаллар.
Бөлөх састаабыгар тыа хаһаайыстыбатын салалтатын салайааччыта Лена Бочкарева, култуура салайааччыта Степан Слепцов, сир боппуруостарыгар салаа салайааччыта Динара Корнилова, сыана агенствотын сүрүннүүр исписэлииҺэ Аида Апросимова, үөрэх салалтатын салайааччыта Петр Потапов киирдилэр.
Мунньахха барыта 60 олохтоох кыттыыны ылла. Отчуоту сиһилии истэн баран, олохтоохтор баһылыкка ыйытыыларын биэрдилэр. Чуолаан, нэһилиэккэ эт тиэллиитин, саҥа оскуола тутуутун түргэтэтэргэ үлэлэһиини, чааһынай олорор дьиэ докумуоннарын оҥоһуллуутун, түргэн интернет хаһан киирэрин, таба этигэр сыананы ким хонтуруоллуурун, олорор дьиэҕэ уот ситимин счетчигын туруоруутун ыйытылар, этиилэрин киллэрдилэр. Маны тэҥэ, кустуурдар оттук мас тиэллиитин, саҥа хочуолунай хаһан үлэҕэ киирэрин уонна ордук тыа хаһаайыстыбатын эйгэтигэр сыһыаннаах элбэх боппуруос киирдэ, бу тула киэҥ кэпсэтии буолла. Кытыы нэһилиэктэргэ кыһыҥҥы суол түмүктэннэ эрэ, аһынан – таҥаһынан хааччыллыы ыарахан. Онон, атыы – эргиэн киинэ үлэҕэ киирэрин кэтэһэллэрин эттилэр.
Түмүккэ, мунньахха кэлбит дьон, улуус баһылыга уонна дьаһалтата 2024 сылга ыыппыт үлэтин биһирииллэрин биллэрдилэр.
Салгыы баһылык үүммүт сыл улууска Сомоҕолоһуу уонна Бэриниилээх буолуу сылынан биллэриллибитин, инники былаан элбэҕин эттэ. Онон, бары бииргэ биир сомоҕо буолан улууспут үүнэрин — сайдарын туһугар үлэлиэҕиҥ, түмсүүлээх буолуохха диэн ыҥырда.
Уопс.кэрр. Тамара Шадрина