Муус устар 26 күнүгэр Кустуурбут ытык сиригэр Уһуктаах анныгар олохтоох дьаһалта тэрийиитинэн «Бытантай эбэ бэлэҕэ» балык күрэҕэ үрдүк таһымнаахтык буолла.
Бу күн араас тиэхиньикэлэр үрэххэ диэри парадтаан субурустулар. Болдьоммут кэмигэр, 12 чааска балык күрэҕин үөрүүлээх арыллыыта буолла. Уопсайа 44 киһи күрэххэ кытынна. Ону тэҥэ эбэҕэ Кустууртан, Саккырыыртан үгүс киһи тоҕуоруһа муһунна.
Умсугутуулаах балыктааһын түмүгүнэн Марта Горохова “Тихие удочки» хамаандата кыайыы өрөгөйүн биллэ уонна 1 буочука бэнсиининэн наҕараадаланна. 2-с бочуоттаах миэстэни Илья Рожин хамандыырдаах Кустуурдааҕы уот ситимнэрин хамаандата ылла уонна 150 лиитирэ бэнсиининэн биһирэннэ. 3-с миэстэни Кустуурдааҕы «Кэнчээри» оҕо уһуйаана ылан, 100 лиитирэ бэнсиини бириис тутта.
Ону таһынан анал ааттар олохтонон, «Бастакы балык» — Иннокентий Старостин, “Улахан балык” – Саргылана Горохова, “Кыра балык” – Петр Стручков, “Элбэх балык” – Петр Горохов ылан, туоһу суругунан уонна сыаналаах бириистэринэн наҕараадаланнылар. Бары кыттааччыларга Аллараа-Бытантай нэһилиэгин олохтоох дьаһалтата туоһулуур сэртипикээти үөрүүлээх быһыыга-майгыга туттарда.
Балык күрэҕэ ыытыллар күнүгэр анаабыт курдук күн-дьыл туран биэрэн, дьон-сэргэ сибиэһэй салгыҥҥа дуоһуйа сынньанна, үөрдэ-көттө.
Надежда Слепцова, И.Н. Слепцов аатынан Кустуур орто оскуолатын дириэктэрин иитэр үлэҕэ солбуйааччыта