Эбээн-Бытантай улууһун киинигэр Саккырыырга “Гарпан” этнокултуурунай киин иһинэн арыллыбыт “Түгэс” киинэ саалата үлэлээбитэ 5 ый буолла. 
«2024 сыл алтынньы ыйыттан Саккырыырга киинэ саалата арыллан үлэлиэҕиттэн ыла уопсайа 22 киинэни көрдөрдүбүт. Киинэ саалата хайдах үлэлиир диир эбит буоллахха, киинэ көрдөрөргө сүрүн тэриллэрэ проектора уонна ноутбуга буолар, кинилэр биир ситиминэн үлэлииллэр.
Көрдөрөр киинэлэрбитин «Экстра Синема” диэн тэрилтэ дьаһайар, ноутбукка анал бырагыраамалаах, онно киинэ каталога баар, онтон таламмыт ити тэрилтэбитигэр этэбит, кинилэр көҥүл биэрдэхтэринэ киинэни качайдыыбыт уонна көрдөрөбүт (аапт. – Билиэт атыытыттан киирэр дохуот 70% «Экстра Синема” тэрилтэҕэ барар). Интернет сибээһэ бытаан буолан, биир киинэ 3 күн хачайданар, ол да буоллар, саҥа тахсыбыт киинэлэр бэйэбит улууспутугар улахан экраҥҥа көстөрө олус үчүгэй!
«Түгэс” киинэ саалата арыллыаҕыттан улахан дьон, эдэр ыччат, оскуола оҕолоро сэргээн сылдьаллар. Көрөөччүтэ мэлдьи элбэх. Үксэ сахалыы киинэни көрдөрө сатыыбыт.
Киинэҕэ киирэр билиэт куйаар ситимин нөҥүө атыыланар, дьон син үөрэнэн эрэллэр. Ол эрэн, интернет сибээһэ бытаан буолан, дьон үксэ картанан эбэтэр уу харчынан биэрэллэр.
Инники былааннарбыт диэн өссө эбии саҥа колонкалары ылан, тыаһын-ууһун тупсаран, куорат киинэ саалаларыттан туох да итэҕэһэ суох буолуохпут диэн бигэ эрэллээхпит,» — диэн “Гарпан” этнокултуурунай киин звукооператор ассистена, “Түгэс” киинэ саалатын үлэтин сүрүннүүр Александр Ефимов кэпсээтэ.
Санатар эбит буоллахха, Саккырыырга 216 миэстэлээх «Түгэс” киинэ саалата ааспыт сыл алтынньы 4 күнүгэр үөрүүлээх быһыыга-майгыга арыллыбыта. Бу күн өрөспүүбүлүкэбит үрдүнэн биир кэмҥэ, биир бириэмэҕэ 40 киинэ саалата арыллан, ол иһигэр биһиэхэ, сүдү историческай суолталаах түгэн буолбута.
“Гарпан” этнокултуурунай киин култуура министиэристибэтэ ыыппыт куонкурсугар кыттан, 498 000 солк. сууммалаах LED экран ылбыттара. Бу экран барыта 1 мөл. солк. сыаналаах буолан, онон 502 тыһ. солк. Түгэһиир дьаһалтата уйуммута. «Экстра Синема” тэрилтэ 600 тыһ. солк. киинэ көрдөрөр проекторы биэрэн, маныаха Түгэһиир нэһилиэгин дьаһалтата, баһылыга Сергей Аликов, солбуйааччыта Дмитрий Сыроватский өйөөннөр, 290 тыһ. солк. утары үбүлээн, киинэ саалабыт быстыбакка үлэлиир. Бу туһунан «Түгэс” киинэ саалата үөрүүлээх арыллыытыгар «Гарпан” этнокултуурунай киин дириэктэрэ Раиса Старостина бэлиэтээн эппитэ.
Сардаана Копырина