Кэлиҥҥи кэмнэргэ полиция судургута суох үлэтигэр кэрэ аҥардар ылсан, ситиһиилээхтик үлэлииллэр. Биир оннук кэрэ куонан Эбээн-Бытантайдааҕы полиция отделениетын сэрэхтээх буолуу миэрэлэрин уонна террору утары харыстабылы хааччыйар бөлөх полицейская Евгения Петрова буолар.
— Мин Горнай улууһуттан төрүттээхпин, Кэбээйи улууһугар улааппытым. 2021 сыллаахха Сангардааҕы гимназияны бүтэрбитим. Бу сыл Дьокуускайдааҕы гуманитарнай колледжка «юриспруденция правохранительной деятельности” салааҕа туттарсан киирбитим. 2025 сылга үөрэхпин түмүктээн, юрист идэтин баһылаабытым.
Үөрэхпин бүтэрээт, Эбээн-Бытантай улууһугар кэлэн, бэс ыйын 2 күнүттэн үлэбин саҕалаабытым. Бастакы өйдөбүлүм, санаам диэн олус тымныы, киин сиртэн ыраах сытар уһук хоту улуус буолара биллэр. Дьиҥнээх аартыка диэни манна кэлэн биллим.
Бииргэ үлэлиир кэлэктиибим олус үчүгэй, бары эдэрдэр, туох баарынан көмөлөһөллөр, сүбэлииллэр. Үлэлиир, олорор усулуобуйам үчүгэй.
Хамнас өттүн эттэххэ, федеральнай хамнас алын кээмэйин ылабын. Бастакы кэмҥэ ыстааһа суох саҥа үлэһиттэргэ хамнас кыра буоларын эрдэ билэрим, кэминэн барыта баар буолуоҕа, туох даҕаны чэпчэкитик кэлбэт диэн өйдүүбүн.
Инники былааным диэн үлэ суолунан үүнэн-сайдан иһии.