Полиция майора, полиция боломуочуйалаах старшай учаскыабай Анжелика Саввинова атырдьах ыйын 21 күнүттэн полиция начальнигынан ананна. Бу туһунан СӨ ИДьМ бирикээһин бу күннэргэ тутта.
Анжелика Валерьевна 2002 сыллаахтан ис дьыала уорганын сотруднигынан, чуолаан Ньурба улууһун вневедомственнай охрана сотруднигынан үлэтин саҕалаабыта. Салгыы 2007 сыллаахха офицерскай дуоһунаска ананан, Абый улууһун Ис Дьыала отделыгар сулууспатын салҕаабыта. Онтон Эбээн-Бытантай улууһугар кийиит буолан кэлэн, 2010 сыллаахтан полиция пуунугар сокуоннай саастарын ситэ илик оҕолор инспекторынан үлэлиир. 2017 сыллаахха полиция пуунун учаскыабайынан, 2019 сыллаахха старшай учаскыабайынан үлэлээбитэ уонна полиция майора бэлиэни ылбыта.
Полиция пуунугар саҥа ананыылар манан эрэ бүппэттэр. Коммендантскай бөлөх полицейская, младшай лейтенант Айгуля Слепцова быйылгыттан үрдээн, учаскыабайынан ананна. Даҕатан эттэххэ, Айгуля Яковлевна ис дьыала уорганыгар 2019 сыллаахтан үлэлиир.
«Эбээн-Бытантайдааҕы полиция пуунугар ыстаатынан 8 сотрудник көрүллэр. Ол онтон билигин үс вакансия аһаҕас турар: полиция боломуочуйалаах старшай учаскыабай, икки коммендантскай бөлөх полицейская. Бу вакансияларга биһиги аармыйаҕа сулууспалаабыт, орто уопсай үөрэхтээх (11 кылаас), 35-гэр диэри саастаах эдэр дьону үлэҕэ күүтэбит”, — диэн Анжелика Валерьевна ыҥырда.
Сардаана Копырина