Олунньу 11 күнүгэр Саха Өрөспүүбүлүкэтин Бырабыыталыстыбатын 2025 сыллааҕы үлэтин отчуоттуур мунньах Үөһээ Бытантай нэһилиэгэр буолан ааста.
Олохтоохтору кытта 15 киһиттэн састааптаах бөлөх үлэлэстэ. Мунньахха “Дюбун” этно-культурнай кииҥҥэ нэһилиэк дьоно балачча муһунна. Мунньаҕы иилээн-саҕалаан улуус баһылыга Иннокентий Стручков ыытта.
Ситэриилээх былаас бөлөҕө, бастатан туран, нэһилиэк олохтоохторугар наҕараадалары туттарда. Ол курдук, нэһилиэк баһылыга Лев Горохов «Гражданскай килбиэн» үрдүк бэлиэни, дьаһалта сүрүннүүр исписэлииһэ Альберт Старостин, оробуочайа Афанасий Иванов СӨ Бырабыыталыстыбатын, оскуола бибилэтиэкэрэ Мария Стручкова Аартыка сайдыытыгар уонна хотугу норуоттар дьыалаларыгар министиэристибэ, урбаанньыт уонна оскуола хаһаайыстыбатын сэбиэдиссэйэ Семен Захаров Аартыкатааҕы атыы логистическай хампаанньатын уонна Үөрэх уонна билим министиэристибэтин, «Сайдыы» хочуолунай маастара Валерий Петров ОДьКХ уонна энергетика министиэристибэтин махтал суруктарын туттулар. 
СӨ Бырабыыталыстыбатын 2025 сыллааҕы үлэтин отчуотун кэннэ ыйытыыларга, санаа атастаһыытыгар киирдилэр. Дьарҕаалаах дьоно долгутар элбэх боппуруостарын ыйыттылар, санааларын этиннилэр.
Бастатан туран, билиҥҥи кэмҥэ сытыытык турар үөрэх тэрилтэтигэр буолаары турар уларыйыыларга тохтоотулар. Оскуолаҕа үлэ миэстэтин сарбыйыы тахсыа дуо диэн сэрэхэдийдилэр. Үөрэхтээһин сайдыытын хааччыйар киин дириэктэрэ Албан Стрекаловскай улуус үрдүнэн ыстаат көҕүрүөхтээҕин, ол эрэн үксүн көмө, техническэй персонал көҕүрүөхтээҕин, үлэлии сылдьар учууталларга уларыйыы суоҕун тоһоҕолоон эттэ. Мантан салгыы саҥа оскуола-саад тутуутун сурастылар. Оскуола-саад тутуута 2025 сыл туругунан 6 миэстэҕэ турарын бэлиэтээтэ.
Нэһилиэк дьоно сылын аайы туруорар боппуруостара — сайыҥҥы кэмҥэ бөртүлүөт сырыыта. Бөртүлүөт көтүүтэ киһи мунньуллуутуттан тутулуктааҕын өйдөөн, кытыы нэһилиэк олохтоохторун айана харгыстамматын туһугар атын көрүҥү толкуйдуохпут диэн Дмитрий Садовников этиитэ инникигэ эрэли үөскэттэ.
Социальнай бородуукта тиэллиитэ, күөх рейсэ быйыл кэлбэтэҕэ нэһилиэк дьонун долгутар боппуруоска Арктическай атыы-эргиэн хампаанньа генеральнай директорын солбуйааччыта Иннокентий Петров опторг тэрилтэтэ иэскэ олорорунан, быйыл сүрүн бородуукта 5 көрүҥэ кэлиэҕин, оптовай сыананан атыыланыаҕын, күөх рейсэҕэ харчы суоҕун бэлиэтээтэ.
Быйыл саас Дьарҕаалаах бөһүөлэгэ түргэн интернет киириитин онлайн-куолаһыгар кыайбыта. Ол оборудованиета кыайан тиэллэн кэлбэккэ, 2007 сылга көһөрүллүбүтүн сибээс миниистирин солбуйааччыта Михаил Черноградскай эттэ.
Онтон салгыы ФАП дьиэтин тутуута үп суоҕунан ыытыллыбатаҕын, сүөһүлээх дьоҥҥо көмө эбии аһылык аҕыйах да буоллар кэлиэҕин, салгыы үлэлэһиэхтэрин бэлиэтээтилэр. Өрөспүүбүлүкэ Бырабыыталыстыбатын туһааннаах салайааччылара бары боппуруостарга чопчу, толору эппиэти биэрдилэр. Дьарҕаалаахтар көрсүһүүнү сэргээтилэр, бырабыыталыстыба үлэтин биһириибит диэн санааларын эттилэр.
Нина Софронова, биһиги уопс. кэрр.
Хаартыскаҕа түһэрдэ Семен Слепцов